«Սարսափելի օրեր եմ ունեցել երեխային կորցնելու տեսարանը խաղալիս». Նաստասյա Գոլովկո
ՎԻԴԵՈՆաստասյա Գոլովկոն շուրջ 9 ամիս նկարահանվել է «Պատվից առավել» սերիալում` մարմնավորելով Տաթեւի կերպարը: Թե ինչպիսին էր աշխատանքային ընթացքը եւ ինչ է պատրաստվում անել սերիալի ավարտից հետո, նա պատմել է BRAVO.am-ին:
Դերասանուհին նշել է, որ աշխատել են ծանր գրաֆիկով.«Հոգնած, հիվանդ, չքնած օրեր ենք ունեցել, նույնիսկ մինչ այժմ մեկ-մեկ քնիս մեջ նկարահանման ընթացքից երազներ եմ տեսնում եւ վեր թռնում: Բայց այս ամենն ունի նաեւ հաճելի կողմ. ոչ ոք չի ասել, թե աշխատանքը պետք է թեթեւ լինի. ամեն առավոտ մեծ պատասխանատվությամբ արթնացել եւ նկարահանման եմ գնացել»:
Նաստասյայի խոսքով՝ գործընկերների լուրջ վերաբերմունքն աշխատանքին եւս իրեն ուժ է տվել.«Այդպիսի գրաֆիկով աշխատելիս կարող ես սպառվել, հոգեպես այնքան ծանր տանել, որ այլեւս չկարողանաս շարունակել: Հիշում եմ՝ ինչպիսի սարսափելի օրեր եմ ունեցել երեխային կորցնելու տեսարանը խաղալիս, նույնիսկ արտասվում էի նկարահանումներից հետո, չնայած՝ գործընկերներս ինձ այդտեղ էլ միայնակ չէին թողնում: Այնքան շատ ժամանակ ենք անցկացրել միասին, որ դարձել ենք ընտանիքի պես»:
Տաթեւի դերակատարը ասել է նաեւ, որ հետաքրքիր սերիաները դեռ առջեւում են՝ շնորհիվ լավ խմբի՝ պրոդյուսեր Ելենա Արշակյանի, սցենարիստ Անահիտ Մխիթարյանի եւ ռեժիսոր Գուրգեն Սարգսյանի գլխավորությամբ:
Նկարահանումներն ավարտվել են, սակայն Նաստասյան դեռ չգիտի՝ որը կլինի իր հաջորդ քայլը.«Դեռ չեմ որոշել ինչ եմ անելու՝ նկարահանվելու եմ այլ նախագծում, թե հանգստանալու եմ: Նկարահանվելու նոր առաջարկ ունեմ, նաեւ՝ Նոր տարվա միջոցառում վարելու… Ինչ էլ լինի, վստահ եմ՝ լավ է լինելու»:
