Դատարանը մերժեց Խաչատուրովի պաշտպան Միհրան Պողոսյանի միջնորդությունը
ԻՐԱՎՈՒՆՔԵրևանի առաջին ատյանի դատարանի դատավոր Աննա Դանիբեկյանը դեկտեմբերի 3-ին մերժեց ՀԱՊԿ-ի նախկին գլխավոր քարտուղար Յուրի Խաչատուրովի պաշտպան Միհրան Պողոսյանի միջնորդությունը` իր պաշտպանյալի նկատմամբ սահմանահատումների արգելքը վերացնելու վերաբերյալ: Դատարանը արձանագրեց, որ Յուրի Խաչատուրովի սահմանահատումներին արգելք կիրառված չէ միջդատական վարույթի ընթացքում:
«Հաշվի առնելով, որ գործում առկա չեն այդ մասին վկայող փաստաթղթեր, միաժամանակ, դատարանը արձանագրում է, որ արգելք կիրառված չէ նաև դատարանի կողմից: Դատարանը արձագանքում է, որ միջնորդության պահանջը Յուրի Խաչատուրովի սահմանահատումների արգելքի վերաբերյալ առարկայազուրկ է»,- ասաց Աննա Դանիբեկյանը:
Դատավորը նշեց, որ Յուրի Խաչատուրովը կարող է դիմել համապատասխան մարմիններ նման խոչընդոտների առկայության դեպքում:
