Որոշ մարդիկ էդպես էլ չհասկացան, որ իրենք արդեն պետական պաշտոնյա են. Բաբկեն Թունյանը՝ Արամ Մանուկյանի մասին

ԱԺ «Իմ քայլը» դաշինքի պատգամավոր Բաբկեն Թունյանը ֆեյսբուքյան իր էջում գրառում է կատարել՝ անդրադառնալով Աջափնյակ վարչական շրջանի ղեկավարի տեղակալ Արամ Մանուկյանի գրառմանը, որում, մասնավորապես, ասվում էր. 

«Եթե կառավարությունը որոշի, որ Ամուլսարը հանք է դառնալու ,ես արձակուրդ եմ վերցնելու ու պայքարելու եմ այդ որոշման դեմ։

ՀԳ Ու նաև պատրաստ եմ հեռանալու դիմում գրել»։

Գրառմանն ի պատասխան՝ Թունյանը գրել է.

«Որոշ մարդիկ էդպես էլ չհասկացան, որ իրենք ոչ թե ակտիվիստ են, այլ արդեն պետական պաշտոնյա։ 
Էդ մարդիկ չհհասկացան էն պատասխանատվությունը, որը դրվել է իրենց ուսերին։ 
Էդ մարդիկ չհասկացան, որ հիմա իրենց ասած ամեն խոսքից առաջ պետք է 1000 անգամ մտածեն, նոր խոսեն կամ գրեն, որովհետև պետական պաշտոնյայի խոսքը ու գործելաոճը պիտի տարբերվի ակտիվիստից։
Էդ մարդկանց համար ամենակարևոր նպատակներից մեկը շարունակեց մնալ շատ լայք հավաքելը։ 
Էդ մարդիկ անգամ չհհասկացան, որ իրենց բաց թողած կիքսերից ու իրենց ծիծաղի առարկա դարձրած հիմար արդարացումներից հետո պիտի ինքնակամ հեռանային։
Ու էդ մարդկանց պետք է արագ ազատել էդ պատասխանատվությունից, շատ արագ։ Իրենք էլ են մեղք, չեն դիմանում, ցրված են դառնում, իրականության զգացումն ու անգամ անձնական իրեր են կորցնում։ 
Գնացեք ձեր իրերին տիրություն արեք, որ չկկորցնեք, թողեք ձեր տեղը աշխատեն էն մարդիկ, որոնք իրենց գործը սիրով կանեն ու հասկանալով։»։