Լիլի Մորտոն, Աննա Մանուչարյանը, Սերգեյ Դանիելյանը՝ Sport сlub-ի լողավազանում․ նախագծի բեքսթեյջն ու հետաքրքիր պահերը

Ջրային մարզաձևեր, որոնք կպահպանեն Վարդավառի «թաց» տրամադրությունը․ Sport сlub հումորախառն սպորտային նախագծի սպասվող թողարկման հյուրերը Լիլի Մորտոն, Աննա Մանուչարյանը,Սերգեյ Դանիելյանը և սինքրոն ջրացատկի Եվրոպայի բրոնզե մեդալակիրներ Լև Սարգսյանն ու Վլադիմիր Հարությունյանն են։  

Tert.am Life-ը ներկա է եղել Sport сlub-ի նկարահանումներին և բեքսթեյջից առանձնացրել հետաքրքիր դրվագները։

Ըստ նախագծի հեղինակների՝ Վարդավառի օրը ջրային մարզաձևեր ներկայացնելը սպասված էր, հյուրերի ընտրությունն էլ արել են՝ հաշվի առնելով համարձակությունն ու հետաքրքրությունը, ինչպես սովորաբար անում են մյուս թողարկումներ դեպքում։

«Եթե ջուր, լողավազան, Վարդավառ, միանգամից պատկերացնում ենք Լիլի Մորտոյին, անգամ, ավելի շուտ, քան ջրացատկորդներին, Սերգեյ Դանիելյանին հրավիրել ենք, որովհետև գիտենք, որ նա շատ լավ է լողում, Աննա Մանուչարյանին էլ հրավիրել ենք՝ որպես տաղանդավոր դերասանուհու։ Սպորտային հատվածն ապահովելու են Լև Սարգսյանն ու Վլադիմիր Հարությունյանը, որոնք վերջերս դարձել են սինքրոն ջրացատկի Եվրոպայի բրոնզե մեդալակիրներ»,- նշեց հաղորդավար Գրիգ Գևորգյանը։

Լիլի Մորտոն հաղորդմանը ներկայացել էր լողազգեստով և երեկոյան ակտիվ դիմահարդարմամբ: Հարցին՝ չի՞ անհանգստանում, որ լողավազանում կարող է դիմահարդարումը փչացնել, նա պատասխանեց․ «Ես նկարահանումներին միշտ դիմահարդարմամբ եմ ներկայանում»։

Առիթն օգտագործելով՝ նախագծի մյուս մասնակից Տարոն Իսպիրյանը՝ Պոնչը, աղջիկներին առաջարկեց առհասարակ չդիմահարդարվել․ «Նրանք այնքան գեղեցիկ են, որ վստահ եմ, այդ դիմահարդարումը պետք չէ։ Բոլոր աղջիկներին հորդորենք, որ չդիմահարդարվեն կամ շատ քիչ դիմահարդարվեն, որովհետև պետք է իրական դեմքով շփվեն տղաների հետ»։

Դիմահարդարման թեման, սակայն, Լիլիին այնքան չէր անհանգստացնում, որքան լողալ չիմանալը: «Լողալ չգիտեմ և հիմա ինքս էլ անհանգիստ եմ, մտածում եմ՝ ինչ խաղեր են լինելու՝ ողջ կմնա՞մ, թե՞ ոչ»,- նկարահանումից առաջ ասաց նա։

Լիլի Մորտոյի մասնակցությունը թողարկմանը զարմանալի էր՝ հաշվի առնելով փաստը, որ վերջերս նա հայտարարեց նույն թիմի իրականացրած Women’s сlub նախագծից հեռանալու մասին: Ստեղծագործական նույն թիմի մեկ այլ նախագծում հյուրընկալված Լիլին իր հեռանալուն ու նախագծի մյուս մասնակիցների հետ վիճաբանությանն անդրադարձավ առանց մեր հարցադրման՝ կատակելով, թե կռիվ է եղել, իսկ Գրիգը շտապեց ուշադրություն հրավիրել փաստի վրա, թե իրենք որքան լավ են շփվում՝ փորձելով ցրել վեճի մասին խոսակցությունները։

Ինչ վերաբերում է  Sport сlub-ի հյուրերի, թեմաների ու սպորտը հումորով ներկայացնելուն, Գրիգն ասաց․ «Ձևաչափն ինչ-որ տեղից վերցված չէ: Այն մտածված է այնպես, որ մեզ հնարավորություն է տալիս իրարից շատ տարբեր հաղորդումներ պատրաստել։ Թեմաների տեսանկյունից ևս փորձում ենք այնպիսի իրավիճակներ մտածել, որոնք չեն կրկնվի, կրկնում ենք միայն այն մրցույթները, որոնք հանդիսատեսի, հեռուստադիտողների կողմից շատ են սիրվել։ Կարծիքները շատ են, մեծ մասը՝ դրական: Կարևոր փաստ է, որ եթերում ունեցել ենք հինգ հաղորդում, սակայն հաղորդման մասին արդեն շատերն են տեղեկացված։ Եթերում ենք լինում կիրակի օրերին, որպեսզի մարդիկ աշխատանքային շաբաթն ամփոփեն դրական էմոցիաներով»։

Հաղորդավարը նշեց, որ ստեղծագործական թիմը նախապես է քննարկում ու որոշում՝ ով է լինելու հյուրն ու ինչպես կարող են սպորտը ներկայացնել հումորով։ «Կադրից դուրս աշխատող մարդիկ՝ Չարենցը, Վահե Հովհաննիսյանը, Արմեն Սարգսյանը, Գևորգը Ենոքյանը, պրոդյուսեր Վլադիմիր Սահակյանը և մենք՝ կադրում աշխատողներս, հավաքվում ենք ու նախ որոշում, թե ինչ մարզաձևի ենք անդրադառնալու, ապա, թե հայտնիներից ով կարող է իրեն լավ զգալ այդ ոճում։ Հետո որոշում ենք, թե ինչպիսի դետալներ ավելացնենք, որպեսզի լինի և՛ հետաքրքիր, և՛ ծիծաղելի»,- նշեց Գրիգը։

Sport Club-ում հրավիրված հայտնիները նաև զանգահարում են պատահական համարներով և զրուցում մարդկանց հետ։ Գրիգից հետաքրքրվեցինք, թե ինչ զվարճալի դեպքեր են եղել՝ արդյոք լինում են հետ զանգելու դեպքեր․ «Զանգահարում ենք փակ համարից, այնպես որ, հետ զանգել չեն կարող։ Սակայն որևէ խնդիր չի եղել, կարծում եմ՝ մարդիկ նայում են, տեսնում իրենց և հումորով մոտենում հարցին։ Իհարկե, որևէ վիրավորական բան չենք ասում, մարդիկ չեն երևում, որ իրենց վատ զգան։ Մի քանի անգամ արել ենք, մեծ մասամբ մարդիկ ծիծաղել են։ Ավելին, տասնյակ նամակներ ենք ստանում, որտեղ նշված են հեռախոսահամարներ և խնդրում են, որ զանգահարենք հենց այդ համարով»։

Լուսանկարները՝ Էլեն Գասպարյանի

Աղբյուր