«Թուրքիայում գիտակցում են պետության և պետականության գինն ու նշանակությունը». Արթուր Ղազինյան
ՎԵՐԼՈՒԾՈՒԹՅՈՒՆՆԵՐ
«Մեկ Հայաստան» կուսակցության համահիմնադիր Արթուր Ղազինյանը ֆեյսբուքյան իր էջում գրել է.
«Ստամբուլի քաղաքապետի ընտրություններում հաղթանակ է տարել ընդդիմությունը, իսկ Էրդողանի թեկնածուն ճանաչել է իր հակառակորդի հաղթանակը:
Հիշեցնեմ, որ սա կրկնակի ընտրություններ էին, քանի որ նախորդ ընտրությունների արդյունքները դատարանը ճանաչել էր անվավեր:
Պետք է նշել, որ Էրդողանի իշխանության համար սա լուրջ հարված էր, պետք էր արձանագրել հաղթանակ, սակայն Թուրքիայի իշխանությունները չգնացին ընտրությունների արդյունքները կեղծելու ճանապարհով:
Նույնիսկ ավտորիտար Թուրքիայում գիտակցում են, որ ընտրությունները կեղծել չի կարելի:
Եթե ընտրություններով հնարավոր է հաղթել իշխանությանը, ապա ոչ մի արտաքին ուժ չի կարող սադրել ներքին քաղաքական խժդժություններ, իսկ ժողովուդն իր դժգոհությունը հայտնելու համար կսպասի մինչև հերթական ընտրություններ:
Ցավոք Հայաստանի նախկին իշխանությունները չհասկացան այս պարզ իրողությունը և իշխանությունն ամեն գնով պահելու մոլուցքի համար պատասխան տվեցինք մենք բոլորս՝ Հայաստանի ներքին քաղաքականություն հրավիրելով բազմաթիվ օտարերկրյա ծառայություններ և գործակալական ցանցեր:
Թուրքիայում գիտակցում են պետության և պետականության գինն ու նշանակությունը, իրենք են լուծում իրենց խնդիրները՝ պահպանելով ու ամրացնելով ժողովրդի իշխանություն ձևավորելու բացառիկ իրավունքը, պետական և ազգային ինստիտուտների կենսունակությունն ու վստահելիությունը»:
