Դանակահարություն՝ մորը հայհոյելու համար

1in.am-ը գրում է.

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Մարինե Մելքոնյանի նախագահությամբ ավարտվել է Արաքսյա Սուքիասյանի գործի դատական քննությունը:

1974 թվականին ծնված Արաքսյան մեղադրվում էր տուժողի առողջությանը խուլիգանական դրդումներով ծանր վնաս հասցնելու համար, ինչ հետևանքով տուժողը մահացել է՝ ՀՀ քրեական օրենսգրքի 112 հոդվածի 2-րդ մասի 14-րդ կետով:

7 տարի առաջ՝ 2009 թվականի օգոստոսի 3-ին, Արաքսյան նույն դատարանի կողմից դատապարտվել էր նույն հոդվածի ավելի մեղմ՝ առանց մահվան ելքի մասով՝ տուժողի առողջությանը դիտավորությամբ ծանր վնաս հասցնելու համար: ՀՀ քրեական օրենսգրքի 112 հոդվածի 1-ին մասով նա դատապարտվել էր 3 տարի ազատազրկման:
2012 թվականի հունվարի 20-ին, պատիժը լրիվ կրելով, Արաքսյան ազատություն էր դուրս եկել:

Իսկ 4 տարի անց՝ 2016 թվականի հունվարի 15-ին նա փաստորեն նորից հայտնվել էր անազատության մեջ՝ նույն արարքի ավելի ծանր մասով մեղադրվելով:

Ըստ մեղադրանքի՝ 2016 թվականի հունվարի 8-ին, ժամը 23-ն անց 40-ի սահմաններում Արաքսյան գտնվել է ծանոթի՝ Աշոտ Օվոյանի տանը՝ Պարույր Սևակի փողոցում գտնվող բնակարանում:

Կենցաղային հարցերի շուրջ Արաքսյան, ըստ դատական ակտի, վիճաբանել է տանտիրոջ հետ: Նա պահանջել է, որ Աշոտը տանից վռնդի իրենց ծանոթ Յակով Գրիգորևին: Ըստ Արաքսյայի՝ հայհոյանք է եղել իր մայրիկի հասցեին…

Վեճի ընթացքում Արաքսյան զայրացել է, խոհանոցից վերցրել է խոհանոցային դանակը, վերադարձել է հյուրասենյակ, հարձակվել ու ծեծի է ենթարկել, ապա դանակով դիտավորությամբ բազմաթիվ հարվածներ է հասցրել Աշոտ Օվոյանին՝ նրա առողջությանը պատճառելով ծանր վնաս՝ կրծքավանդակի շրջանում չթափանցող վնասվածք, ձախ ակնակապիճային շրջանի փափուկ հյուսվածքների, ձախ այտային, կրծքավանդակի ձախ կեսի առաջակողմնային, ձախ ազդրի վերին երրորդի, աջ քունքամկանի հետին եզրի արյունազեղումների, կրծքավանդակի աջ կեսի կողմնային քերծվածքների, գլխի ճակատագագաթային շրջանի ճանկռվածքների, ձախ այտային շրջանում կտրած վերքի, կրծքավանդակի աջ վերին կեսի հետին և աջ բազկի վերին երրորդի կողմնային մակերեսների շրջաններում ծակած-կտրած չթափանցող վերքերի ձևով:

Այս ձևով վարվելով տանտիրոջ հետ՝ Արաքսյան թողել-հեռացել է:
Աշոտ Օվոյանը կրծքավանդակի շրջանում ծակած-կտրած չթափանցող վնասվածքների հետևանքով արյան առատ կորուստ է ունեցել, ինչը, ըստ դատական ակտի, պատճառ է դարձել նրա մահվան:

Աշոտ Օվոյանի դին այդ բնակարանի հյուրասենյակում հայտնաբերել է նրա ընկեր Վլադիմիրը՝ դեպքից երեք օր անց՝ 2016 թվականի հունվարի 11-ի առավոտյան, ժամը 10-ն անց 15-ի սահմաններում:

Ընդհանուր իրավասության դատարանում Արաքսյա Սուքիասյանն իրեն լիովին մեղավոր է ճանաչել, նրա միջնորդությամբ գործը քննվել է արագացված ընթացակարգով:
Դատարանը Արաքսյա Սուքիասյանի պատասխանատվությունն ու պատիժը ծանրացնող հանգամանք է համարել նրա կողմից հանցագործությունների կատարման ռեցիդիվը:
Տուժողի իրավահաջորդը ներկայացրել էր 2 միլիոն դրամի քաղհայցի պահանջ՝ 1 միլիոն դրամը՝ որպես հուղարկավորության ծախսեր, 1 միլիոն դրամը՝ որպես այլ ծախսեր՝ կապված «ավանդական սովորույթների հետ»:

Դատարանը Արաքսյա Սուքիասյանին մեղավոր է ճանաչել մեղսագրված արարքի համար՝ ՀՀ քրեական օրենսգրքի 112 հոդվածի 2-րդ մասի 14-րդ կետով:

Արաքսյա Սուքիասյանը դատապարտվել է 6 տարի 6 ամիս ազատազրկման:
Տուժողի իրավահաջորդի քաղհայցը բավարարվել է միայն հուղարկավորության ծախսերի՝ 1 միլիոն դրամի չափով: Մնացած մասով քաղհայցը թողնվել է առանց քննության:
Դատավճիռը չի բողոքարկվել և մտել է օրինական ուժի մեջ: