Վթարի դեպքում այլեւս ԱՊՊԱ-ին չպետք է սպասել. փոփոխություններ ոլորտում

2016 թվականի սեպտեմբերի 1-ից, ավտոմեքենաների ապահովագրման ոլորտում մի շարք էական փոփոխություններ են կատարվել, որոնք այսօր «Արմենպրես» մամուլի կենտրոնում ներկայացրեց Հայաստանի ավտոապահովագրողների բյուրոյի տնօրեն Վահան Ավետիսյանը:
Առաջին փոփոխությունը վարորդների կողմից պատահարների գրանցման ինքնուրույն համակարգն է, որը մինչ օրս էլ է գործել, սակայն վթարի նյութական վնասի շեմը սահմանված էր 50 հազար դրամ, իսկ սեպտեմբերի մեկից մինչեւ 100 հազար դրամ գնահատված վթարի դեպքում վարորդները կարող են ինքնուրույն լրացնել հայտարարագիրը եւ 5-ից 7 րոպե հետո մեքենաները վթարի վայրից տեղափոխել: Սա համարվում է հնարավորություն, ոչ թե՝ պարտավորություն:

Այս տարվա մարտին գրանցված պատահարներից 230-ի դեպքում վարորդները լրացրել են համաձայնեցված հայտարարագիր, իսկ ԱՊՊԱ-ների կողմից հատուցվել է 10 մլն դրամ: Հունիսին գրանցվել է 430 նման դեպք եւ հատուցվել է շուրջ 17 միլիոն դրամ:

Վնասի շեմը 50 հազար դրամից 100 հազար դրամ դարձնելուց հետո ակնկալվում է, որ կգրանցվի 1200-ից 1500 դեպք: Վթարի ժամանակ տուժող կողմը 3-ից 7 օրվա ընթացքում, նոր համակարգի համաձայն, կստանա իր հատուցումն ապահովագրական ընկերությունից:
Մնացած բոլոր պատահարները կգրանցեն ՃՈ աշխատակցիները:

ԱՊՊԱ գործակալները պարտավոր չեն սեպտեբերի 1-ից հետո գալ դեպքի վայր: Վթարի կողմերը պետք է սպասեն ՃՈ-ի աշխատակցին եւ չտեղաշարժեն մեքենաները եւ վթարի հետեւանքով առանձնացված դետալները: Վթարից հետո 40 րոպեի ընթացքում հեռախոսով վարորդները պետք է տեղեկացնեն իրենց մեքենաներն ապահովագրած ընկերություններին վթարի մասին:

«Կամ գրանցում են ինքնուրույն կամ գրանցվում են ՃՈ-ի կողմից: Կարծում եմ՝ շատ պարզ է: Ներկայիս գործող 7 տարբերակից անցնում ենք չափազանց պարզ մոդելի»,- ասաց Վահան Ավետիսյանը՝ նշելով, որ վթարների բոլոր տվյալները կհավաքագրվեն մեկ հարթակում ու կտրամադրվեն ե՛ւ ԱՊՊԱ ընկերություններին, ե՛ւ ապահովագրողների բյուրոյին:

Սեպտեմբերի 1-ից այլեւս ԱՊՊԱ պայամանագրերում վարոդների անուններ նշելու անհրաժեշտություն չկա: Մեքենաները կհամարվեն ապահովագրված վարորդական իրավունք ունեցող ցանկացած անձի կողմից, սակայն ոչ անվանական եւ առանց լրացուցիչ վճար վճարելու:

Մինչեւ սեպտեմբերի 1-ը կնքված անվանական պայմանագրերը դառնում են անսահմանափակ վարորդների համար նախատեսված եւ ապահովագրված վարորդը կարող է իր մեքենան վարման հանձնել ցանկացած անձի, որն ունի վարորդական իրավունքի վկայական եւ մեքենան կհամարվի պատշաճ ապահովագրված:
Սահմանվել է նաեւ ԱՊՊԱ սակագնային նոր համակարգ, ապահովագրավճարի փոփոխություն տեղի չի ունեցել, վարորդի տարիքային գործակից այլեւս չկա:

«Համակարգը շատ պարզ է եւ բազմագործոնից վերածվել է պարզ աղյուսակի: Որոշակիորեն փոփոխվել են նաեւ առաջին 5 տարվա վիճակագրության արդյունքում ռիսկային խմբերի գործակիցները»,- ընդգծեց Հայաստանի ավտոապահովագրողների բյուրոյի տնօրենը: