Տարվա տնտեսական հաջողություններից մեկը Երեւանի նոր տոնածառն էր. Բոստանջյան
ՔԱՂԱՔԱԿԱՆՈՒԹՅՈՒՆՏնտեսական քաղաքականության մեջ իներցիոն տեմպով ամեն ինչ շարունակվել է, կառավարության տնտեսական քաղաքականությունը մենք նոր պետք է տեսնենք․ այս մասին NEWS.am-ի հետ զրույցում ասաց տնտեսագետ, նախկին պատգամավոր Վարդան Բոստանջյանը։
«Այս կարճ ժամանակահատվածում մեզ մոտ եղան ընտրություններ, քաղաքական խառը իրավիճակներ, հնարավոր էլ չէր հասնել որեւէ ցանկալի արդյունքի, բնականաբար իներցիոն տեմպով շարունակվել է այն, ինչ եղել է, եւ այդ պարագայում մենք նոր պետք է տեսնենք, թե նոր կառավարության տնտեսական քաղաքականությունը արդյունավետ է, թե արդյունավետ չէ, ենթադրում է զարգացում, թե չի ենթադրում։ Հիմա բազմաթիվ մասնագետներ, վերլուծաբաններ ասում են, որ խոշոր առումով տնտեսական զարգացման տեսլական դեռեւս ձեւավորված չէ, թե գաղափարախոսության տեսանկյունից, թե տնտեսական հեղափոխության տեսանկյունից, թե կադրային ապահովվածության տեսանկյունից դեռեւս ոչ շատ հասկանալի դրության մեջ ենք, որի պարագայում միակ բանը Նոր տարին դիմավորելն է, եւ տնտեսական հաջողություններից մեկը Երեւանի նոր տոնածառն էր․ շատ լավ տոնածառ էր, ժողովուրդը ոգեշնչվեց դրանից»,–ասաց տնտեսագետը։
Տարին ամփոփելով՝ տնտեսագետը նշեց, որ չնայած տարվա ընթացքում բազմաթիվ քաղաքական փոփոխություններ եղան, սակայն գրանցվեցին նաեւ հաջողություններ. «Մարդկանց մոտ տպավորություն ստեղծվեց գոնե, որ գողությունը, կոռուպցիան կարող է հետապնդվել։ Թերեւս միայն դրա վերաբերյալ առաջընթաց կարող ենք արձանագրել, իհարկե, եթե դա շարունակական լինի, եւ շարունակվի այն, ինչ եղել է»։
