Կեղծ լրատվականներն ու ֆեյք օգտատերերը զբաղված են կեղծ օրակարգ ձևավորելով...

Էլլա Հովհաննիսյանը ֆեյսբուքյան իր էջում գրում է.

ԱԺ արտահերթ ընտրությունների քարոզարշավի համար նախատեսված 12 օրը գրեթե մոտնում է ավարտին: Այսօր 9-րդ օրն է, և այս ժամանակահատվածը մեզ թույլ է տալիս արդեն որոշ վերլուծություններ կատարել քարոզարշավի ընդհանուր պատկերի մասին, համեմատություններ անցկացնել և ընդհանուր իրավիճակի մասին որոշակի պատկերացում կազմել: 

Այսպես ուրեմն, այս նախընտրական քարոզարշավը որակապես ոչ մի աղերս փաստացիորեն չունի այդքան շահարկված նոր Հայաստան եզրույթի հետ: Քանզի այս անգամ ևս նախընտրական պայքարը, որոշ քաղաքական ուժեր, կրկին նախընտրել են անցկացնել փոխադարձ վիրավորանքների և այլոց պախարակելու միջոցով: 

Այս համատեքստում սակայն, պետք է նշենք նաև հակառակ տրամաբանության կողմնակից ԲՀԿ նախագահ Գագիկ Ծառուկյանին, ով քարոզարշավի ամենաառաջին օրն իսկ հայտարարեց, որ իր կուսակիցներին խնդրել է իրենց քարոզարշավը չկառուցել ինչ-որ մեկին պախարակելու մոդելով, և չպատասխանել նման սադրանքներին: Ինչպես տեսնում ենք հորդորի արդյունքը ակնհայտ է. ԲՀԿ քարոզարշավը անցնում է ամենալոյալ և քաղաքակիրթ պայմաններում: Գագիկ Ծառուկյանը, ով անձամբ է տանում քարոզարշավը, իր ելույթների ժամանակ անդրադառնում է միայն ԲՀԿ ծրագրային դրույթներին, արդեն իսկ կատարված աշխատանքին՝ գործարանների բացում, սոցիալական բնակարանաշինություն, աղքատության կրճատում: Եվ այս ամենի ֆոնին ոչ մի թթու խոսք այլ կուսակցությունների թեկնածուների հասցեին: Օրինակելի քարոզարշավ:Զարմանալի չէ, որ բոլոր մարզերում Ծառուկյանին դիմավորում են աղուհացով և մեծ ջերմությամբ: 

Թերևս հենց վերոհիշյալ հանգամանքն էլ ազնիվ ընտրապայքարի կանոնները չընդունող, և, ընդհանրապես, պայքարի քաղաքակիրթ տարբերակներից անտեղյակ որոշ ուժեր չկարողացան անցկացնել իրենց աղեստամոքսային տրակտով. այսինքն չկարողացան մարսել:

Հերթական շռնդալից ընդունելությունից հետո մամուլում սպրդեցին քաղաքական պատվերի առաջին ծիծեռնակները: Սկզբում դրանք վերաբերում էին Ծառուկյանի գործերի վատ լինելուն, հետո հասկանալով, որ հավատալի լինելու համար դա չափից շատ լկտի սուտ էր, անցան համացանցային հանրահայտ մեթոդին՝ խոշորացույցի տակ էին պահում Ծառուկյանի յուրաքանչյուր բառ:

Նման լրատվականների բջիջներին համապատասխան գտնվեց Ծառուկյանի բառապաշարից մեկ բառ՝ լորդուհի: Եվ, ով հրաշք, օրնիբուն մամուլով պտտում են այս բառը և նույն ուղեղի բջիջներին մակարդակին համապատասխան հումորներ գրառում: Իհարկե ոչ մեկի մտքով չի անցնում բացել որոնողական համակարգը և այնտեղ գրել անգլերեն Lordess՝ լորդուհի բառը: 

Հարգելի ողորմելիներ, լորդուհին անգլիական ազնվական տիկնոջ տիտղոս է, որը ժառանգվում է սերնդեսուրդ, և ցույց է տալիս կնոջ ազնվական ծագումը: Բրիտանիայի խորհրդարանը բաղկացած է 2 պալատից, որոնցից մեկն է Լորդերի պալատը, որի կին անդամները կրում են լորդուհի տիտղոսը: 

Եվ, այնուամենայնիվ, «նոր Հայաստան» եզրույթը կայանալու է նաև հենց ձեզ նման կեղծ լրատվականների վերացմամբ: Որովհետև դուք այս պահին զբաղված եք «բյուզանդական վեճով»: Եթե այս արտահայտության իմաստն էլ չեք հասկանա, ինչպես որ չեք ընկալել, որ գոյություն ունի լորդուհի բառ, ապա ասեմ, որ «բյուզանդական վեճը» Հայաստանի մի ողջ պետականության անկման պատճառ դարձավ: Գոնե սա որոնեք ու կարդացեք, օգուտ կլինի ձեզ: 

Մաղթում եմ ձեզ շուտափույթ վերացում: Այդպիսով դուք նպաստելու եք պետության ևս մեկ օղակի՝ 4-րդ իշխանության կայացմանը: Հաջողություն եմ մաղթում բոլորիս: