Փոխոստիկանապետը ԱՄՆ դեսպանատան ներկայացուցիչներին է ներկայացրել բալային տուգանային համակարգը
ՀԱՍԱՐԱԿՈՒԹՅՈՒՆՆոյեմբերի 27-ին ՀՀ ոստիկանության պետի տեղակալ, ոստիկանության գնդապետ Հովհաննես Քոչարյանն ընդունեց Հայաստանում ԱՄՆ դեսպանության թմրամիջոցների դեմ պայքարի եւ իրավապահ համագործակցության ծրագրի տնօրեն Մայքլ Շուլմանի գլխավորած պատվիրակությանը։
Հովհաննես Քոչարյանը, ողջունելով հյուրերին, փոխանցեց ՀՀ ոստիկանության պետ Վալերի Օսիպյանի երախտիքի խոսքը՝ համագործակցության եւ Հայաստանի ոստիկանության նախաձեռնություններին աջակցելու պատրաստակամության համար։ Ոստիկանության պետի տեղակալը պատվիրակությանը մանրամասն ներկայացրեց ստեղծվելիք պարեկային ծառայության՝ պատրուլի, ինչպես եւ ճանապարհային երթեւեկության ոլորտում ներդրվելիք բալային տուգանային համակարգի մասին։
Մայքլ Շուլմանը, շնորհակալություն հայտնելով ջերմ ընդունելության համար, ընդգծեց, որ պատրաստակամ են շարունակել համագործակցությունն ու աջակցությունը Հայաստանի ոստիկանության արդիականացմանն ու ծառայությունների որակի բարձրացմանը միտված նախաձեռնությունների կյանքի կոչմանը։
Հանդիպմանը քննարկվեցին նոր կազմավորվող պարեկային ստորաբաժանման ծառայողների վերապատրաստմանը, սպառազինությանը, համազգեստին, հատուկ տրանսպորտային միջոցներին, ինչպես եւ Հայաստանի ոստիկանության կրթահամալիրի դասախոսների ԱՄՆ-ում վերապատրաստմանը վերաբերվող հարցեր։
