«Կլիմաթոն Երևան» ծրագրի շրջանակում քաղաքի բնապահպանական և էներգետիկ կառավարումը բարելավելու նպատակով նորարական լուծումներ են մշակվել
ՀԱՍԱՐԱԿՈՒԹՅՈՒՆԿլիմայական խնդիրների լուծմանն ուղղված ծրագրի շրջանակում շուրջ 40 ծրագրավորման և տվյալների վերլուծության հմուտ երիտասարդ ու պատանի, ինժեներ, երիտասարդ գիտնական և նորարար, նաև պարզապես կրեատիվ մտածողություն ունեցող մարդ թիմերի բաժանված 24 ժամվա ընթացքում մշակել է նորարարական լուծումներ՝ քաղաքի բնապահպանական և էներգետիկ կառավարումը բարելավելու նպատակով:
«Արմենպրես»-ի հաղորդմամբ՝ Երևանի քաղաքապետարանում ամփոփվեց «Կայուն էներգիայի զարգացման հիմնադրամ»-ի հետ անկացված «Կլիմաթոն Երևան» երկրորդ հաքաթոնը:
Մասնագիտական ժյուրիի անդամները, ծանոթանալով բոլոր առաջարկներին, «Կլիմաթոն Երևան» բնապահպանական խնդիրների լուծմանն ուղղված հաքաթոնի առաջին տեղի մրցանակը շնորհեցին «Future in our hands» թիմին: Պատանիները հաքաթոնի շրջանակում ստեղծել են աղբի վերամշակման խնդիրը լուծող բջջային հավելված՝ բաղկացած 5 բաժնից: Երկրորդ հորիզոնականը զբաղեցրեց «Արևոտ ապագա» թիմը՝ արևային շերտավարագույրների գաղափարով, որոնք նախատեսված են ոչ միայն արևից պաշտպանվելու համար, այլև հնարավորություն են տալու արևային էներգիա ստանալու: Հաքաթոնի երրորդ պատվավոր մրցանակը տրվեց «SKVINST» թիմին՝ օդի աղտոտվածության աստիճանը յուրաքանչյուրին հասանելի դարձնող ծրագրով:
Թիմերին շնորհավորեց և հաղթողներին մրցանակները հանձնեց «Երևան՝ խելացի քաղաք» ծրագրի մշակման և իրականացման հանձնաժողովի նախագահ Հովիկ Մուսայելյանը:
«Խելացի քաղաք գաղափարի մեջ, անշուշտ, ներառված են նաև կլիմայական խնդիրները, որոնք պահանջում են նորարարական մտքերով լուծումներ: Այս առումով կլիմաթոնը լավ հարթակ է՝ նոր գաղափարներ ստեղծելու և դրանք կիրառելի դարձնելու առումով», - նշեց Մուսայելյանը:
Երևանի քաղաքապետարանի աշխատակազմի զարգացման և ներդրումային ծրագրերի վարչության պետ Տիգրան Սարգսյանն իր հերթին շնորհավորելով բոլոր մասնակիցներին՝ ընդգծեց, որ հաքաթոնի ընթացքում ներկայացված գաղափարները կարող են նաև ներդրումային հետաքրքիր առաջարկներ դառնալ:
«Կլիմաթոն Երևան» երկրորդ հաքաթոնի մասնակից բոլոր թիմերն արժանացան մասնակցության հավաստագրերի և խրախուսական մրցանակների:
Կլիմայական մարտահրավերների մասին գլոբալ հաքաթոնն այս տարի միաժամանակ անցկացվել է աշխարհի 45 երկրի 104 քաղաքում:
