Էքս-Մարսել և Երևանի պետական համալսարանների միջև համագործակցությունը ընդլայնվել է, նախատեսվում է ևս 32 փոխանակում
ՀԱՍԱՐԱԿՈՒԹՅՈՒՆԵրևանի պետական համալսարանի և Էքս-Մարսել համալսարանի միջև համագործակցությունը ընդլայնվել է՝ ընդգրկելով ԵՊՀ արևելագիտության ֆակուլտետը: 2018-2019թթ-ին նախատեսվում է իրականացնել ևս 32 փոխանակում՝ ԵՊՀ-ից Էքս- Մարսել և հակառակ ուղղությամբ:
«Արմենպրես»-ի հաղորդմամբ՝ այս մասին նշեց ԵՊՀ Միջազգային համագործակցության բաժնի վարիչ, Միջազգային հարաբերությունների ֆակուլտետի դասախոս Հայկուհի Մկրտչյանը՝ Էքս Մարսել և Երևանի պետական համալսարանների պատվիրակությունների միջև տեղի ունեցած հանդիպման ժամանակ, որը տեղի ունեցավ հոկտեմբերի 25-ին Հայաստանում Ֆրանսիայի դեսպանատանը: Հանդիպման նպատակն էր ամփոփել երկու համալսարաների միջև երկարամյա փոխանակումների արդյունքում կատարված աշխատանքը և նախանշել համագործակցության հեռանկարները:
Խոսելով համագործակցության արդյունավետության մասին՝ նա ասաց, որ ուսանողները, ֆրանսիական միջավայրում ապրելու, սովորելու հրաշալի հնարավորության հետ մեկտեղ, ունեն նաև ֆրանսերենի իրենց գիտելիքները կատարելագործելու, ֆրանսիական ավանդույթներին ու մշակույթին ծանոթանալու հնարավորություն:
Էքս-Մարսել համալսարանի հայագիտության դասախոս, հետազոտող, «Էրասմուս+» ծրագրի համակարգող Պատրիկ Տոնապետյանը ասաց, որ իր երկու գործընկերների հետ միասին Երևան է ժամանել Ֆրանկոֆոնիայի պատմական գագաթնաժողովից հետո, Երևանի հիմնադրման 2800-ամյակի կապակցությամբ, որպեսզի երևանյան գործընկերների հետ խոսեն համագործակցության խնդիրների մասին և քննարկեն ապագա քայլերը:
«Մեր համագործակցությունը նոր չէ, այն մի քանի տասնամյակ է, ինչ գործում է, իսկ «Էրասմուս+» ծրագրի շնորհիվ նոր թափ հաղորդվեց: Շեշտը դրված է հատկապես ֆրանսերենի և գրականության, հնէաբանության, միջնադարյան արվեստի, ինչպես նաև հայագիտության վրա»,- ընդգծեց նա:
Տոնապետյանը նշեց, որ համալսարանը միակն է Ֆրանսիայում, որ ունի Հայագիտական կենտրոն: Ֆրանսիացի այն ուսանողները, որոնք ցանկություն ունեն Երևանում սովորելու, մեկնումից առաջ կարող են հայերեն սովորել Էքս-Մարսել համալսարանում և ուսումնասիրել հայկական մշակույթը:
Եվրոպայի հետ համագործակցության ծրագրի պատասխանատու Քրիստել Դյուպոն Ֆերիեի (Էքս-Մարսել համալսարանի արտաքին կապերի վարչություն) խոսքով՝ Ֆրանսիան երկրորդն է այն երկրների շարքում երկիրն է, ուր հայ ուսանողները ավելի հաճախն են մեկնում իրենց ուսումը շարունակելու: «Ըստ «Կամպոս ֆրանս» գործակալության, տարեկան մոտ 7571 հայ ուսանող է մեկնում արտասահման՝ սովորելու։ Ցավոք, Ֆրանսիան չի մտնում այն երկրների տասնյակի մեջ, որտեղից ավելի հաճախն են ժամանում Հայաստան՝ ուսանելու: Հայկական ուսումնական հաստատությունները տարեկան Ֆրանսիայից ընդունում են մինչև 5 ուսանող: Այս թիվն ամենայն հավանականությամբ կմեծանա «Էրասմուս+» ծրագրի շրջանակներում նոր նախաձեռնությունների շնորհիվ: Համագործակցությանը խթանելու նպատակով նախատեսվում է Էքս-Մարսել համալսարանի Հայագիտության կենտրոնի զարգացումը»:
Միջազգային շարժունության ծրագրի պատասխանատու Օլիվիե Պերեսը (Էքս-Մարսել համալսարանի միջազգային կապերի վարչություն, արվեստի, գրականության, լեզվի և հասարակական գիտությունների ֆակուլտետ) ներկայացրեց փոխանակումների իրականացման և ուսանողների ընդունման որոշ մանրամասներ. «Համալսարանում յուրաքանչյուր ուսումնական տարվա սկզբում կազմակերպվում է ուսանողների ընդունելության կենտրոն՝ պատուհան, որպեսզի ժամանումից հետո բոլոր կարևոր ծառայությունները կատարվեն մեկ վայրից: Հայ ուսանողների մոտ նկատում եմ մեծ առաջընթաց: Շատ ուրախ եմ, որ Հայաստան վերադարձած ուսանողներից ոմանց գեղեցիկ ապագա է սպասվում, իսկ ոմանք էլ ցանկանում են ավելի խորացնել իրենց գիտելիքները լեզվի և մշակույթի բնագավառում, փոխանակման մի նոր ծրագրի շնորհիվ»,- նշեց Օլիվիե Պերեսը:
Էքս-Մարսել և Մոնպելյեի համալսարանների հետ կապերի համակարգող, ԵՊՀ Ակադեմիական նվաճումների կենտրոնի պատասխանատու Թագուհի Բլբուլյանը նշեց, որ իրեն բախտ է վիճակվել օգտվել դասախոսական շարժունակության ծրագրից և երկշաբաթյա դասախոսությունների շարք իրականացնել Էքս-Մարսել համալսարանում: «Մինչ այդ գոյություն ունեին ուսանողական փոխանակման և դասախոսների կատարելագործման, վերապատրաստման ծրագրեր: Սակայն «Էրասմուս+»-ն այն եզակիներից է, եթե ոչ եզակին, որ լայն հնարավորություններ ընձեռեց դասավանդողներին վերապատրաստվել ոչ թե տեսական գիտելիքների ձեռքբերման շնորհիվ, այլ գործնականորեն՝ դասավանդման միջոցով իրականացնելով մի շարք գործառույթներ»,- ասաց նա:
Հանդիպմանը ելույթ ունեցան նաև «Էրասմուս+» ծրագրի շրջանակում Էքս-Մարսել համալսարանում ուսանած Սարգսյան Անին, Մարիամ Առաքելյանը, Բաղդասարյան Աննան:
Երկու համալսարանների միջև համագործակցությունը մինչ օրս օգտվել է «Էրասմուս +»–ի «Միջազգային կրեդիտային շարժունակության» Եվրամիության ֆինանսավորմամբ 3 ծրագրերից և, ընդհանուր առմամբ, իրականացվել է շուրջ 50 շարժունակության ծրագիր: 2018 թվականից փոխանակումների շրջանակներն ընդգրկում են Մերձավոր Արևելքի վերաբերյալ ուսումնասիրություններ, շրջակա միջավայրին, ինչպես նաև աշխարհագրական գիտություններ:
