Կլեոպատրա. անգերազանցելի գեղեցկուհի՞, թե՞ անթերի տգեղ
ՀԱՍԱՐԱԿՈՒԹՅՈՒՆՄենք գիտենք, որ...
Եգիպտոսի թագուհի Կլեոպատրան այնպիսի գեղեցկուհի էր, որպիսին աշխարհը չէր տեսել: Ժամանակակից ֆիլմերում նա ներկայանում է որպես հմայիչ և անգերազանցելի գեղեցկուհի:
Իրականում այնքան էլ այդպես չէ:
Ճիշտ է՝ կանանց մասին այդպես չեն արտահայտվում, բայց ճշմարտությունից հեռու չես փախչի. պարզվում է՝ Կլեոպատրան ոչ միայն գեղեցկուհի չի եղել, այլ ընդհակառակը՝ եղել է բավականին տգեղ կին:
Կլեոպատրա 7–րդ Ֆիլիպատորը (մեր թվարկությունից առաջ 69–30 թվականներ) հելլենիստական Եգիպտոսի վերջին թագուհին է, ով սերվել է մակեդոնական Պտոլոմեյների (Լիգատների) ցեղից: Նրա կառավարման տարիների վերջում Եգիպտոսը նվաճվել է Հռոմի կողմից, իսկ Կլեոպատրան ինքնասպանություն է գործել, որպեսզի չընկնի Օկտավիանոսի ձեռքը:
Կլեոպատրան, ըստ մեզ հասած նրա պատկերների, եղել է մի քիչ գեր և ոչ արտահայտիչ դեմքով կին: Հնէաբանների կողմից գտնված նրա արձանիկի վրա ուրվագծվում է մանր աչքերով, երկարավուն դեմքով և արծվաքիթ արևմտյան տիպի կին: Նրա պատկերով մետաղադրամների վրա նկատվում է սապատավոր քիթ և սուր կզակ: Վերջերս անգլիացի գիտնականների կողմից հաստատվել է, որ նախկինում անհայտ կանանց մեկ տասնյակ արձանիկներ ևս հանդիսանում են Կլեոպատրայի արձանիկները: Դրանց միջոցով պարզվել է, որ Կլեոպատրան 38 տարեկանում եղել է 152 սանտիմետր հասակով, սև մազերով և փչացած ատամներով գիրուկ կին: Ըստ հետազոտողների, այդպես էլ պետք է լիներ, քանի որ նա պատակնում էր Պտոլոմեյների տոհմին, որոնք գեղեցիկ արտաքինով և մարմնակառուցվածով առանձնապես չէին առանձնանում:
Չնայած իր կառուցվածքի և արտաքինի այս ոչ գրավչությանը, Կլեոպատրան մտել է պատմության մեջ որպես տղամարդկանց համար ամենացանկալի կանանցից մեկը: Ընդ որում, անգամ «կանանց գիտակ» այնպիսի տղամարդկանց, ինչպիսիք են Հուլիոս Կեսարը և Մարկ Անտոնիոսը: Հավանաբար Կլեոպատրայի ոչ արտաքին հմայքը և սեքսուալությունը հնարավորություն էին տալիս նրան գրավել ցանկացածի սիրտը: Կլեոպատրան հագնվում էր ճաշակով և հագուստի՝ կիրք առաջացնող բաց մասերով: Անթերի էին նաև նրան շրջապատող գեղեցկուհի աղջիկները: Բացի այդ, թագուհին լավ զարգացած էր, տիրապետում էր «աչքերի խաղին», հետաքրքիր զրուցակից էր, երգում էր, նվագում էր, պարում էր, տիրապետում էր մի քանի լեզուների, հասկանում էր գրականությունից, արվեստից և փիլիսոփայությունից: Ինչպես ասում էր պրոֆեսոր Բեխտերևը, հետազոտելով Գրիգորի Ռասպուտինի կյանքը, հավանաբար Կլեոպատրան ևս Ռասպուտինի պես տիրապետում էր «սեռական հիպնոսի» արվեստին: Այս ամենից զատ, տղամարդկանց հրապուրում էր հենց միայն այն միտքը, որ կարելի է քնել մի կնոջ հետ, ում Եգիպտոսի ամբողջ բնակչությունը համարում է Իսիդա աստծո երկրային արտացոլանքը:
Ընդունենք, որ կնոջ հմայիչ լինելը բոլորովին էլ չի նշանակում, որ նա անպայման գեղեցկուհի է: Եվ իրոք, շատ կարելի է տեսնել «սառը» գեղեցկուհիների և «տաք» ոչ այնքան գեղեցիկ կանանց, դա երբեմն միայն առաջին հայացքից է այդպես երևում: Չգիտես ինչու մեր հայ տղամարդկանց պատկերացումներում կինը պետք է արտաքինից գեղեցկուհի լինի նույն կերպ, ինչպես գեղեցիկ է նրա ավտոմեքենան կամ կոստյումը: Բայց այդ ամենը ընդամենը ցուցադրելու համար է, որ ուրիշները տեսնեն ու նախանձեն: Հետո էլ գեղեցկուհին իր մինուսներն ունի. նրան ավելի շուտ են ուրիշները «գողանում»:
