ՊՊԾ գնդի գրավման օրը վիրավորում ստացած ոստիկան Գագիկ Մկրտչյանը մահացել է

Պարեկապահակային ծառայության գնդի գրավման օրը` հուլիսի 17-ին, վիրավորում ստացած ոստիկանության ավագ ենթասպա Գագիկ Մկրտչյանն օգոստոսի 13-ին մահացել է: Ինչպես տեղեկացրին ՀՀ առողջապահության նախարարությունից, բժիշկներ ը մոտ մեկ ամիս պայքարել են նրա կյանքը փրկելու համար, սակայն չի հաջողվել:

Որովայնի շրջանում հրազենային վիրավորում ստացած ոստիկանը բազմաթիվ վիրահատությունների է ենթարկվել, նրա մոտ մի քանի անգամ սրտի կանգ է արձանագրվել:

«Այսօր հիվանդանոցում մահացավ հուլիսի 17-ին զինված խմբի կողմից ՊՊԾ գնդի վրա գրոհի ժամանակ հրազենային ծանր վնասվածքներ ստացած՝ ՊՊԾ գնդի հերթապահ ծառայության հերթապահի օգնական, ոստիկանության ավագ ենթասպա Գագիկ Մկրտչյանը:

Վնասվածքները որովայնի, կրծքավանդակի, ստորին վերջույթների շրջանում էին, բժիշկները չորս անգամ վիրահատել էին նրան, ամեն րոպեն պայքար էր նրա կյանքի համար, սակայն փրկել, ավաղ, չկարողացան:

Գագիկ Մկրտչյանը ոստիկանության համակարգ էր ընդունվել 1993 թ. նոյեմբերին, երբ վտանգված էր մեր երկիրը, և ոստիկանությունը պետություն ն ու ժողովրդին պաշտպանում էր և՛ սահմաններին, և՛ երկրի ներսում: Այդ օրերին պայքարը կյանքի գին ուներ շատերի համար, իսկ ոստիկանի համար հանուն հայրենիքի և մարդու պայքարը կյանքի գին ունի բոլոր ժամանակներում:

Քառասունհինգ տարեկան էր Գագիկ Մկրտչյանը և իրեն վստահված պահակակետում, չնահանջելով ու չհանձնվելով կյանքը տվեց իր վեցամյա որդու համար, բոլորիս երեխաների համար, ողջ ժողովրդի համար:

Ցավն ահռելի է և միակ մխիթարությունը՝ որ ոստիկանության ավագ ենթասպա Գագիկ Մկրտչյանի գործը շարունակողներ կան ու լինելու են, ուրեմն անպարտելի ու աներե ր է լինելու մեր երկիրը»,-ասված է ոստիկանության հաղորդագրության մեջ:

1or.am-ը խորապես ցավակցում ու կիսում է Մկրտչյանի հարազատների անդառնալի կորուստը.....