Հայաստանի ռուսական ռազմակայանի հրետանավորները ոչնչացրել են պայմանական հակառակորդին

Հայաստանի ռուսական ռազմակայանի հրետանային ստորաբաժանումների զինծառայողները, բանակային ավիացիայի եւ հակաօդային պաշտպանության միջոցների աջակցությամբ, «Ալագյազ» զորափորձարանում ոչնչացրել են պայմանական հակառակորդի կենդանի ուժն ու առավել կարեւոր օբյեկտները: Ինչպես «Արմենպրես»-ին տեղեկացրեցին ՌԴ Հարավային ռազմական օկրուգի մամուլի ծառայությունից, դաշտային վարժանքների ընթացքում հրետանավորները երկկողմ վաշտային մարտավարական վարժանքների շրջանակներում զենիթահրթիռային համալիրների հաշվարկների, Մի-24Պ եւ Մի-8ՄՏՎ ուղղաթիռների խմբի հետ համատեղ կատարել են 50-ից ավելի նորմատիվներ, շուրջ 30 կրակային առաջադրանք, այդ թվում 30 տոկոսը՝ պայմանական հակառակորդի զրահապատ օբյեկտների ուղղութամբ մարտական հրաձգությամբ:

Երկկողմ մարտավարական վարժանքների անցկացման ընթացքում ստորաբաժանումների ղեկավարումն իրականացվում Է կառավարման շարժական դաշտային կետերից:

Հրետանավորների, ՀՕՊ-ի ստորաբաժանումների եւ մարտական օդաչուների գործողությունների համակարգումն ապահովում են ավիացիոն նշանառուները, հետախույզները՝ օգտագործելով հետախուզման, կառավարման ու կապի «Ստրելեց» համալիրները եւ անօդաչու թռչող սարքերի հաշվարկները:

Երկկողմ վաշտային մարտավարական վարժանքները Հայաստանում անցկացվում են ռուսական զորամիավորման հրամանատար գնդապետ Վլադիմիր Ելկանովի ղեկավարությամբ օգոստոսի 20-ից մինչեւ սեպտեմբերի 15-ն ընկած ժամանակաշրջանում: Օրական դրանց մասնակցում են 500-ից ավելի զինծառայողներ, վարժանքներում գործի Է դրված շուրջ 100 միավոր ռազմական տեխնիկա: