Հեղափոխությունը դեռ չի հաղթել, հաղթական մի շնչով ամեն ինչ հնարավոր չէ սրբել. Արմեն Բաղդասարյան (տեսանյութ)
ՎԵՐԼՈՒԾՈՒԹՅՈՒՆՆԵՐՔաղաքական վերլուծաբան Արմեն Բաղդասարյանը կարծում է, որ ՀՀ երկրորդ նախագահ Ռոբերտ Քոչարյանը որքան էլ փորձի մոբիլիզացնել հակահեղափոխական ուժերին, քաղաքական առումով հաջողության հասնելու շանս չի ունենա, բայց իշխանություններն էլ պետք է այս իրադարձություններից դասեր քաղեն:
«Հակահեղափոխականները պարզապես օգտվեցին նրանից, որ Քոչարյանին ներկայացված ՀՔԾ մեղադրանքները խոցելի կետեր ունեն, և նրա խափանման միջոցը փոխեցին: Եվ հիմա պետք է դա փորձեն ներկայացնել որպես լուրջ հաղթանակ, որպես նոր իշխանությունների թուլություն և փորձեն համախմբել իրենց ուժերը: Ամեն դեպքում ճիշտ ժամանակ չեն ընտրել, որովհետև նոր իշխանությունները դեռ վայելում են հասարակության անվերապահ աջակցությունը, օգոստոսի 17-ին կերևա: Կարծում եմ՝ նոր իշխանությունների փոքր-ինչ սասանված, թուլացած դիրքերը կամրանան:
Ուրիշ բան, որ նոր իշխանությունները պիտի դասեր քաղեն սրանից, ավելի լրջորեն մոտենան այս հարցերին և փորձեն ամրապնդել իրենց դիրքերը: Իրենք փորձեցին հաղթական մի շնչով, հարվածով սրբել ամեն ինչ, բայց պարզվեց, որ դա շատ կարծր է, շատ դժվար է, դա սխալ է: Հետևողական, խելացի, մտածված աշխատանք է պետք և գումարած դրան՝ հասարակական լայն աջակցություն, հակառակ պարագայում ոչինչ չի ստացվի»,-մանրամասնեց քաղաքական վերլուծաբանը:
Արմեն Բաղդասարյանն ասաց, որ Քոչարյանի գործը նաև ցույց տվեց, որ իշխանությունները ուժային, իրավապահ, դատական համակարգը լիովին չեն վերահսկում. «20 տարի այդ մարմիները կոռուպցիայի մեջ են եղել։ Նախորդ իշխանությունները թե՛ հսկայական գումարներ, թե՛ կոմպրոմատ ունեն ազդեցություն ունենալու համար»։
Արմեն Բաղդասրայանը նշեց, որ հակահեղափոխությունը կարող է մոբիլիզացնել կրիմինալը, ֆինանսական ռեսուրսները, դրան դիմակայելու ընդամենը մի ռեսուրս ունի իշխանությունը՝ ժողովրդական հզոր ալիքի պահպանումը, քանի որ այնպես չէ, որ հեղափոխությունը հաղթել է, այն նոր հիմա սկսվում է, նախկին իշխանությունները շոկից դուրս են գալիս:
Մանրամասները՝ տեսանյութում։
Աղբյուրը՝ tert.am
