Քարաթափման հետեւանքով Գեղարդի վանք տանող հատվածը դեռ փակ է
ՀԱՍԱՐԱԿՈՒԹՅՈՒՆՔարաթափման հետեւանքով Գեղարդի վանք տանող հատվածը դեռ փակ է։ Հայաստանի ԱԻՆ-ից NEWS.am-ին հայտնում են, որ այսօր՝ օգոստոսի 5-ին, ժամը 09:45-ին դեպքի վայր են մեկնել ՀՀ ԱԻՆ ՓԾ հատուկ նշանակության փրկարարական աշխատանքների իրականացման կենտրոնի փրկարարական ջոկատը եւ մարզային փրկարարական վարչության օպերատիվ խումբը:
Կտրվի լրացուցիչ տեղեկություն:
Ավելի վաղ հայտնել էինք, որ օգոստոսի 4-ին, ժամը 06:28-ին «911» ծառայությանը տեղեկություն է հաղորդվել, որ Կոտայքի մարզի Գողթ գյուղի վերջնամասում տեղի է ունեցել քարաթափում, ինչի հետեւանքով Հ-3 ավտոճանապարհի՝ Գեղարդի վանք տանող հատվածը փակ է. անհրաժեշտ է փրկարարների օգնությունը:
Դեպքի վայր են մեկնել ՀՀ ԱԻՆ ՓԾ հրշեջ-փրկարարական ջոկատից մեկ մարտական հաշվարկ, հատուկ նշանակության փրկարարական աշխատանքների իրականացման կենտրոնի փրկարարական ջոկատը, Ճգնաժամային կառավարման ազգային կենտրոնի եւ մարզային փրկարարական վարչության օպերատիվ խմբերը:
Դեպքի վայրում են գտնվել ԱԻ նախարար Հրաչյա Ռոստոմյանը եւ ԱԻՆ ՓԾ տնօրեն փ/ծ գնդապետ Արտակ Նահապետյանը:
Պարզվել է, որ Գողթ գյուղ-Գեղարդի վանք տանող ավտոճանապարհին հարակից լանջից տեղի է ունեցել քարաթափում (մոտ 60 մ երկարությամբ, 10 մ լայնքով եւ մոտ 8 մ բարձրությամբ), ինչի հետեւանքով ճանապարհը ժամանակավորապես փակ է. առկա են այլ թուլացած ժայռաբեկորներ:
Ժամը 13:55-ից մինչեւ 02:22-ը հատուկ նշանակության փրկարարական աշխատանքների իրականացման կենտրոնի փրկարարական ջոկատն իրականացրել է հերթապահություն եւ օժանդակել փլուզման ենթակա հատվածի պայթեցման աշխատանքներին, որոնք իրականացրել է «Նյուտեխշին» ՍՊԸ-ն: «Կոտայքի ՃՇՇ» ՍՊԸ-ն իրականացրել է ճանապարհի մաքրման աշխատանքներ:
Ժամը 01:10-ին ճանապարհի մաքրման աշխատանքները դադարեցվել են եւ կվերսկսվեն առավոտյան:
