Մեր որոշակի անփորձությունը փոխհատուցվում է քաղաքական կամքով. Ռուբեն Ռուբինյան
ՀԱՍԱՐԱԿՈՒԹՅՈՒՆՀՀ արտաքին գործերի նախարարի տեղակալ Ռուբեն Ռուբինյանը թավշյա հեղափոխության ակունքներում կանգնած անձանցից է, քաջատեղյակ հեղափոխության դեպքերին ու դեմքերին: Այսօր նա նույնպես մասնակցում էր «Հեղափոխության դեպքերն ու դեմքերը» խորագրով ցուցահանդեսին։ Ռուբինյանը կարծում է, որ հեղափոխության կարեւորագույն նվաճումը Սահմանադրության 2-րդ հոդվածի իրագործումն է՝ իշխանության վերադարձը ժողովրդին: Թեմայի շուրջ NEWS.am-ը զրուցել է Ռուբեն Ռուբինյանի հետ։
Պարոն Ռուբինյան, իշխանության փոփոխությունից բացի՝ հեղափոխությունն ի՞նչ փոխեց մարդկանց արժեհամակարգում, ՀՀ քաղաքացիների կյանքում։
Հեղափոխությունն ավելին էր, քան պարզապես իշխանափոխությունը: Կարելի է արձանագրել, որ թավշյա հեղափոխությամբ երկրում սերնդափոխություն տեղի ունեցավ։ Մենք հասել էինք մի կետի, երբ երկրի իշխանությունն արժեքային, մտավոր մակարդակում չէր համապատասխանում ժողովրդի մակարդակին, եւ մի ամբողջ երիտասարդ սերնդի գլխավորությամբ իշխանությունը հաջողվեց վերադարձնել ժողովրդին: Ի վերջո՝ Սահմանադրության 2-րդ հոդվածը դարձավ իրականություն։ Հեղափոխությունից առաջ մարդիկ, երիտասարդները, ժողովրդի գերակշիռ մեծամասնությունը մտածում էր՝ մեզնից ոչինչ կախված չէ, մեր փոխարեն մտածում են, իսկ հեղափոխությունից հետո մարդիկ հասկացան, որ յուրաքանչյուրի դիրքորոշումը կարեւոր է, յուրաքանչյուրը կարող է փոխել երկրի զարգացման ընթացքը։
Նախկին իշխանության ներկայացուցիչները եւ նրանց գաղափարակիցները քննադատեցին Ձեր կառավարությանը նաեւ այն պատճառով, որ երիտասարդ ու անփորձ թեկնածուներին պաշտոններ են վստահում։ Դուք էլ Ձեր կարիերան սկսեցիք փոխարտգործնախարարի պաշտոնից, դժվար չէ՞:
Ես ըմբռնումով եմ մոտենում այս իրավիճակին չհամակերպվողների վշտին եւ հույս ունեմ, որ կհամակերպվեն այդ իրավիճակին: Լավ կլինի՝ համակերպվեն, որ ապրում ենք ավելի լավ Հայաստանում, եւ այլեւս հետադիմությունն իշխանության չի վերադառնա։ Հեռացել են նախկինները, որոնք չեն կարողացել լավ կառավարել, եկել են նորերը, որոնք կա՛մ լավ կկառավարեն ու կվայելեն ժողովրդի աջակցությունը, կա՛մ հակառակը՝ կգնան եւ կգա նոր թիմ: Բայց մեր տարբերությունն այն է, որ մենք ապօրինի մեթոդներով չենք պահի իշխանությունը:
Պաշտոն զբաղեցնելը, պետական կառավարումը փորձով չի որոշվում, կա մի կարեւոր գործոն՝ քաղաքական կամք, որից Հայաստանը զուրկ է եղել նախկինում։ Այսօր մենք տեսնում ենք՝ ինչ փոփոխություններ են տեղի ունենում, եւ ես կարծում եմ, որ մեր որոշակի անփորձությունը փոխհատուցվում է քաղաքական կամքով, իսկ փորձը կգա ժամանակին։ Փորձի պակասը կեղծ փաստարկ ու կեղծ կատեգորիա է: Նրանք, որ ասում էին՝ դուք անփորձ եք, ասում էին՝ Սերժ Սարգսյանն անփոխարինելի է:
