14-ամյա երեխային դեռ չեն գտել. սպանության հոդվածով քրգործ է հարուցվել
ՀԱՍԱՐԱԿՈՒԹՅՈՒՆ
Հունիսի 8-ից անհետ կորած համարվող 14-ամյա Հայկ Հարությունյանը չի հայտնաբերվել: Քրեական գործ է հարուցվել սպանության հոդվածով: Այս տեղեկությունը NEWS.am-ի հետ զրույցում հաստատեցին Գլխավոր դատախազության հանրային կապերի բաժնից:
Քրեական գործը հարուցվել է ՀՀ Քրեական օրենսգրքի 104-րդ հոդվածի 1-ին մասի հատկանիշներով (սպանություն):
«Այդ հոդվածով քրեական գործի հարուցումն ամենեւին չի նշանակում, թե հենց սպանության վերաբերյալ տեղեկություն կա, կամ փաստական տվյալներ են ձեռք բերվել: Այն դեպքում, երբ անձը համարվում է անհետ կորած եւ սահմանված ժամկետում նրա գտնվելու վայրը հայտնի չի դառնում, սպանության հատկանիշներով հարուցվում է քրեական գործ եւ կատարվում է քննություն: Այդ ընթացքում անձի հայտնվելու պարագայում քրեական գործը կարճվում է՝ հանցադեպի բացակայության հիմքով: Հույս ունենք, որ տվյալ դեպքում հենց այսպիսի ելք կունենանք»,- նշեց գլխավոր դատախազի խորհրդական Գոռ Աբրահամյանը:
Հիշեցնենք, որ 14-ամյա Հայկ Հարությունյանի անհետանալու վերաբերյալ հաղորդումը ստացվել է հունիսի 8-ին: Արդեն 10 օր է՝ իրավապահները, փրկարարներն ու կամավորները որոնում են աուտիզմ ունեցող երեխային:
