ՀՀԿ խմբակցության մեծ մասը դեմ կքվեարկի կառավարության ծրագրին. Շարմազանով
ՀԱՍԱՐԱԿՈՒԹՅՈՒՆ
Ազգային ժողովի ՀՀԿ խմբակցությունը հնարավորություն կտա, որպեսզի կառավարության ծրագիրը խորհրդարանում ընդունվի: Ազգային ժողովի արտահերթ նիստի մեկնարկից առաջ լրագրողների հետ զրույցում այս մասին ասաց ԱԺ փոխնախագահ Էդուարդ Շարմազանովը: Անդրադառնալով հարցին, թե ՀՀԿ-ից ովքե՞ր են կողմ քվեարկելու կառավարության ծրագրին, Շարմազանովը պատասխանեց. «Դա խմբակցության ղեկավար Վահրամ Բաղդասարյանի լիազորություններն են, նա կասի»:
Նա հավելեց, որ ամեն ինչ արդեն ճշտված է. «Ականատես կլինեք, որ մեծ մասը դեմ կքվեարկի, մի մասն էլ կողմ կքվեարկի»,- ասաց Շարմազանովը:
Շարմազանովը նաև նշեց, որ այսօր խմբակցությունը լքողներ չեն եղել:
Մի խումբ գործարար պատգամավորներ լքել են ՀՀԿ խմբակցությունը: Խմբակցությունը լքելու դիմումներ են ներկայացրել Արթուր Գևորգյանը, Արման Սահակյանը, Ֆելիքս Ցոլակյանը, Շիրակ Թորոսյանը, Արտակ Սարգսյանը, Սամվել Ալեքսանյանը: Հունիսի 6-ին լրագրողների հետ զրույցում ՀՀԿ խմբակցության պատգամավոր Ալիկ Սարգսյանը հայտնեց, որ ինքը կողմ է քվեարկելու կառավարության ծրագրին:
Նիկոլ Փաշինյանը ՀՀ վարչապետ է ընտրվել մայիսի 8-ին: Մայիսի 12-ին ամբողջովին ձևավորվել է նոր կառավարությունը, որը հունիսի 1-ին հաստատել է իր ծրագիրն ու ներկայացրել ԱԺ:
Այս ծրագիրը փորձագիտական շրջանակների կողմից անվանվում է անցումային և որպես առաջնահերթություն սահմանում է մեկ տարվա ընթացքում արտահերթ խորհրդարանական ընտրությունների անցկացումը:
