«Օ՜, տեսնում եք, ես չգիտեի». Մշակույթի նախարարը օպերայի տանիքի ալեհավաքները կհանի

Ունենք ժողովրդական արտիստներ, վաստակավոր արտիստներ, վերջին տարիներին այս երեւույթը ավելի շատ որպես շնորհակալություն հայտնելու ձեւ է եղել եւ մարդկանց մոտ վատ վերաբերմունք կա: Այս մասին, այսօր՝ հունիսի 5-ին, ՀՀ Ազգային ժողովի գիտության, կրթության, մշակույթի, երիտասարդության եւ սպորտի հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում նշեց  «Ելք» խմբակցության պատգամավոր Ալեն Սիմոնյանը:

Նա մշակույթի նախարար Լիլիթ Մակունցից հետաքրքրվեց, թե արդյոք կա՞ն չափանիշներ նման կոչումներ տալու եւ ինչպես է կարգավորվելու այս հարցը հետագայում: Նախարարը նշեց, որ իր համար անընդունելի է այն մոտեցումը, որը նկարագրվեց պատգամավորի կողմից. «Ես բոլոր հարթակներում ասում եմ, որ նոր կառավարությունը չի ունենալու այդ մոտեցումը եւ անձնական կապերը չեն աշխատելու»:

Ալեն Սիմոնյանը բարձրացրեց նաեւ «Փակ շուկայի» հարցը՝ նշելով. «Փակ շուկայի» շենքը թեպետ պատմամշակութային արժեք ուներ, բայց այդուհանդերձ ավերվեց եւ թողնվեց, ժողովրդական լեզվով ասած՝ «ֆուտլյարը» եւ այդ օրվա թե՛ Մշակույթի նախարարությունը, թե՛ իշխանությունները որեւէ բան չկարողացան անել: Հինա նախատեսվում է այն, ինչ մնացել է շենքից, պահպանել, քանի որ վերականգնելու մասին խոսք չի կարող լինել»:

Լիլիթ Մակունցը նշեց, որ Մշակույթի նախարարությունը այսօր հայտարարություն կտարածի, որտեղ նշված է, որ այսուհետ նախարարությունը խստորեն հետեւելու է ցանկացած պատմամշակութային արժեք ներկայացնող շինության արտաքին տեսքի եւ այդ շենքի հետ կապված ցանկացած շինարարական գործողությանը:

Ալեն Սիմոնյանի հաջորդ հարցը վերաբերում էր Օպերայի շենքի գլխին ալեհավաքների առատությանը. «Նախորդ նախարարը ցանկանում էր, որ տանիքին ռեստորան լիներ, մինչդեռ տեղյակ եմ, որ նոր նախարարը բացասաբար է արտահայտվել այդ մտքի մասին: Բայց մի խնդիր կա. շենքը լուրջ արժեք լինելով՝ վրան անտենաներ են տնկած: Անգամ իշխանություններն ուզում էին տեսնել, թե Րաֆֆի Հովհաննիսյանի հանրահավաքին քանի մարդ է հավաքվել, դռելով ծակում տեսախցիկ էին տեղադրում: Խնդրում եմ միջոցներ ձեռնարկել եւ շենքը ազատել ավելորդ բաներից: Նաեւ վերեւի ժամացույցը կարեւոր է, եւ շատ կուզենայի, որ կրկին աշխատեր»,-ասաց նա:

Նախարար Մակունցը նշեց, որ ալեհավաքների եւ մյուս ավելորդությունների մասին կփորձի ավելի լավ տեղեկանալ եւ լուծում գտնել:

Նիստին ներկա Երեւանի քաղաքապետի տեղակալ Կամո Արեյանը տեղեկացրեց, որ Օպերայի շենքի սեփականատերը Մշակույթի նախարարությունն է, եւ նա միանշանակ իրավասություն ունի հանելու ալեհավաքները: «Օ՜, տեսնում եք, ես չգիտեի»,-արձագանքեց նախարարը եւ սիրով ընդունեց Արեյանի առաջարկը: