Փոփոխությունները պետք է ծրագրված իրականացվեն, ոչ թե էմոցիոնալ կերպով. ՀՀ նախագահն անդրադարձավ ԵՊՀ իրադարձություններին

Փոփոխություններ պետք են ոչ միայն Մայր բուհում, այլև դպրոցներում, մանկապարտեզներում. սակայն  դրանք պետք է արվեն ոչ թե էմոցիոնալ կերպով, այլ ծրագրված: «Արմենպրես»-ի հաղորդմամբ՝ հունիսի 1-ին լրագրողների հետ զրույցում նման կարծիք հայտնեց ՀՀ նախագահ Արմեն Սարգսյանն՝ անդրադառնալով ԵՊՀ շուրջ վերջերս ծավալվող իրադարձություններին:

«Կրթական համակարգում փոփոխություններ, իհարկե, պետք են, սակայն կարևոր է, թե դրանք ինչպես են իրականանում: Ես Հայաստանի նախագահն եմ, ով ընտրվել է, որպեսզի օրենքն ու օրինականությունը գործեն: Եվ, իհարկե, փոփոխություններ պետք են ոչ միայն Մայր բուհում, այլև դպրոցում, մանկապարտեզում, ուսուցիչների, դասախոսների մտածելակերպի մեջ»,-ասաց նախագահն ու հավելեց՝ խնդիրն այն է, թե այդ փոփոխություններն ինչպես են կյանքի կոչվում:

Նախագահի կարծիքով՝ պետք է այնպես  անել, որ այդ փոփոխությունները լինեն երկարաժամկետ: «Ոչ թե լինեն այս պահին, էմոցիոնալ, այլ՝ ծրագրված, երկարաժամկետ, որպեսզի  արդյունք տան»,-նշեց Արմեն Սարգսյանը:

Անդրադառնալով ԵՊՀ ուսանողների մտահոգությանը՝ նախագահ Սարգսյանն ասաց՝ դեռ մանրամասն ծանոթ չէ դրանց:  «Ես հրավիրել եմ նրանց ինձ մոտ: Երբ տեսնեմ, կասեմ՝ կիսո՞ւմ եմ նրանց մտահոգությունը, թե՞ ոչ»,-եզրափակեց նախագահը:

Ավելի վաղ տեղի էր ունեցել «ԵՊՀ ռեստարտ» նախաձեռնության բողոքի ակցիան, որի մասնակիցները պահանջել էին ռեկտորի հրաժարականը, անկախ աուդիտի անցկացում, ԵՊՀ հոգաբարձուների խորհրդի լուծարում, ԵՀՊ ուսանողական խորհրդի ու արհմիության գործունեության ժամանակավոր կասեցում։ Ռեկտոր Արամ Սիմոնյանի և նախաձեռնության անդամների հանդիպումը որևէ հանգուցալուծման չէր հանգեցրել։Դրանից հետո ռեկտորը առողջական խնդիրների պատճառով հոսպիտալացվել էր: Դրանից հետո «ԵՊՀ ռեստարտ» նախաձեռնությունը հայտարարեց, որ դադարեցնում է բողոքի ակցիան և առողջություն մաղթում ԵՊՀ ռեկտորին: