Ցավում եմ, որ ՀՀ դրոշը, քաղաքական դիվիդենտներ շահելու այս գործընթացում, ներկայացվում է որպես անպետք մի բան

 

Այսօր Երևանի ավագանու նիստի ժամանակ մի շարք մարդիկ կրկին անգամ խոսեցին Երևանի քաղաքապետարանի կողմից ՀՀ դրոշների ձեռքբերման գործընթացի մասին՝ փորձելով քաղաքական դիվիդենտներ շահել թվային մանիպուլիացիաների դիմելով։

Մեծ վրդովմունքով նշվեց, որ Երևանի քաղաքապետարանը ծախսել է 45 մլն․ դրամ դրոշներ ձեռք բերելու համար։ Նշվեց այն ակնկալիքով, որ հասարակությունը պետք է սա դիտարկի որպես անարդյունավետ ծախս և իր բողոքի ձայնը բարձրացնի։

 

Երևի թե ճիշտ է այն միտքը, որ Սուտը հասցնում է ամբողջ աշխարհը պտտվել մինչ Ճշմարտությունն իր վարտիքն է հագնում։ Այնուամենայնիվ զարմացած եմ այսպիսի մակերեսային ուսումնասիրության և թերի աշխատանքի վրա։

Հարգելի Չուսումնասիրողներ․

 

Այսքան տարի խոսում եք դրոշների մասին, սակայն դժվարացել եք նույնիսկ բյուջեի 4 տող կարդալ և հասկանալ։ Զլացել եք նույնիսկ հարցնել պատասխանատուներին, իսկ հարցերը տվել եք ոչ թե ըմբռնելու այլ ուղղակի հնչեցնելու համար։ Հակառակ պարագայում անհասկանալի է նույն սխալը կրկնելու Ձեր հետևողականությունը։

Իրականում հասկանալով թվային մանիպուլյացիայի նպատակը, երբ ցավոք երկրի սոցիալական վիճակը դրդում է այսպիսի թվեր լսելիս զայրույթ ապրել, հավաստիացնում եմ Ձեզ, որ նույն արդյունքին կհասնեք իրական թվերը հնչեցնելով։ Այս դեպքում առնվազն չեք հայտնվի մեղմ ասած անհարմար վիճակում։

 

Բացվածքով ներկայացնեմ դրոշների տեղադրում ծրագրով նախատեսված 45 մլն դրամը՝ հույս ունենալով, որ այսպիսի մանրամասն պարզաբանումից հետո այլևս հարցեր չեն առաջանա․

 

1․ Երևանի քաղաքապետարանը յուրաքանչյուր տարի հայտարարում է բաց ընթացակարգով մրցույթ դրոշների ձեռքբերման համար։ Այս տարի 3500 հատ 1*2 չափի և 1500 հատ 1,5*3 չափի դրոշների ձեռք բերման համար Ձեր կողմից հաստատված բյուջեյով նախատեսվել էր 16 մլն դրամ։

 

Այս դրոշներն անհրաժետշ են մայրաքաղաքի 529 դրոշակահենքերին (ցանկը հասցեներով հրապարակված է www.yerevan.am կայքում) ՀՀ դրոշներ ունենալու համար։ Բաց ընթացակարգով մրցույթի արդյունքում հաղթող կազմակերպությունը ներկայացրել է 14 մլն 160 հազար դրամ գին և արդյունքում 1 դրոշի արժեքը ստացվել է համապատասխանաբար 2400 և 3840 դրամ ներառյալ ԱԱՀ։ Ցանկացած մարդ, ով առնչություն ունի դրոշի տպագրության հետ (դրոշներն ըստ բնութագրի պետք է լինեն տպագրված հատուկ կտորի վրա՝ պահպանելով դրոշի մասին օրենքով սահմանված գունային գաման) կարող է փաստել, որ այս գները շուկայականից անհամեմատ ցածր են։

 

2․ Վերոնշյալ դրոշները պատշաճ վիճակում պահելու համար անհրաժեշտ է յուրաքանչյուր ամիս փոխարինել նորերով՝ խամրած կամ պատառոտված, նույնիսկ կեխտոտված դրոշներ չունենալու համար։ Պարբերաբար մաքրման ենթակա են նաև պատվանդանները։ Այս ամենի համար, որը բյուջեյում ստացել է <հիմնային պատվանդանների դրոշների փոխման, պատվանդանների մաքրման և սպասարկման աշխատանքներ> անվանումը հատկացվել է 10 մլն դրամ, իսկ բաց ընթացակարգով մրցույթի արդյունքում ներկայացվել է 9 մլն 948 հազար դրամ գին, այսինքն յուրաքանչյուր ամիս 829 հազար դրամ ներառյալ ԱԱՀ։ Սա դրոշ ձեռք բերելու հետ կապ չունեցող հոդված է, այն ներառում է վերամբարձ կռունկների վարձակալությունը, սպասարկող անձնակազմի աշխատավարձը, նյութական և վառելիքի ծախսերը և այլն։

 

3․ Մյուս հոդվածը կոչվում է <օտարերկրյա նախագահների այցերի հետ կապված դրոշակազարդման աշխատանքներ>։ Անվանումը հուշում է, որ այստեղ խոսք է գնում այլ երկրների դրոշների ձեռքբերման և տեղադրման աշխատանքների մասին համաձայն պետական արարողակարգի։ Հաշվի առնելով նախորդ տարիների փորձը բյուջեյով այս հոդվածի համար նախատեսվել է 15 մլն դրամ։ Տարվա սկզբում անհնար է իմանալ թե քանի պատվիրակություն կայցելի Հայաստան և այս թիվը կարող է և տնտեսվել։ Յուրաքանչյուր անգամ ներկայացվում է նախահաշիվ ըստ կատարվող աշխատանքների և ձեռքբերման քանակի, որը հավաստիացնում եմ մեր խիստ վերահսկողության տակ է։

 

4․ Վերջին տողը <Դրոշների տեղադրում> բաժնում կոչվում է <Անկախության օրվան նվիրված Երևան քաղաքի դրոշակազարդման աշխատանքներ> և բյուջեյով հատկացված է 4 մլն դրամ։ Այն իր մեջ ներառում է հենասյուների վրա 0,75*1,5 չափի դրոշների ամրացում համարյա բոլոր գլխավոր փողոցներում, կամուրջների, վերգետնյա անցումների և հրապարակների ձևավորում 0,9*2,10 չափի դրոշներով, ինչպես նաև մի շարք այլ աշխատանքներ, ինչպես օրինակ տոնին նվիրված պաստառների տպագրությունն ու տեղադրումն է։ Ի դեպ այս արժեքի մեջ մտնում է ինչպես տեղադրման աշխատանքները, այնպես էլ ապամոնտաժման և պահեստավորման։ Բաց ընթացակարգով մրցույթի արդյունքում հաղթող կազմակերպությունը ներկայացրել է 3 մլն 950 հազար դրամ գին ներառյալ ԱԱՀ։

 

Երևանի քաղաքապետարանը տարվա ընթացքում մի շարք այլ ծրագրեր իրականացնելիս ձեռք է բերում նաև Երևանի դրոշներ կամ միջոցառումների թեմատիկ լոգոներով դրոշներ, որոնք մտնում են ընդհանուր ձևավորման կոնցեպտի մեջ և ձևավորման մաս են կազմում, սակայն բոլոր այս ձեռքբերումները կատարվում են բաց ընթացակարգով մրցույթների արդյունքում և տարիներ շարունակ հաղթող կազմակերպությունները ներկայացրել են շուկայականից անհամեմատ ցածր գներով առաջարկներ։

 

Հուսով եմ՝ այս պարզաբանումն օգտակար կլինի թե Չուսումնասիրողների, թե մեր համաքաղաքացիների համար, ում պարբերաբար փորձում են զայրացնել թվային տարբեր մանիպուլյացիաների միջոցով։

 

Ցավում եմ, որ ՀՀ դրոշը, քաղաքական դիվիդենտներ շահելու այս գործընթացում, ներկայացվում է որպես անպետք մի բան, որի վրա մեծ գումարներ են ծախսվում։ Իրականում խոսքը մեր ազգային խորհրդանիշի մասին է, որը վստահաբար պետք է ծածանվի մայրաքաղաքում։