Զառիվայր. Pop-corn-ը վերցրել էին ու եկել Զարուհի Փոստանջյանի շոուն նայելու
ՀԱՍԱՐԱԿՈՒԹՅՈՒՆ
Այսօր քաղաքապետարանի առջև հավաքվել էին մի խումբ երիտասարդներ, փոփ-քորնով, 3D ակնոցներով, փուչիկներով և պոստեռներով, որտեղ գրված էր՝ «պահանջում ենք 3D շաու»: Շոու պահանջողներին հավաքել էր Սևան Աղաջանյանը, ազգայնական հայացքներ ունեցող մի երիտասարդ, ով բավականին կտրուկ էր արտահայտվում իր ֆեյսբուքյան էջում Էլթոնջոնների, և, առհասարակ, նմանատիպ երևույթների նկատմամբ։
Իսկ ինչ կապ ունեն 3D շոուն ու Էլթոն Ջոնը քաղաքապետարանի հետ, կապը թերևս ամենաանսպասելին է։ Զարուհի Փոստանջյանը իր թիմակիցներով, երբ ներխուժել էր քաղաքապետարան՝ քաղաքապետի հրաժարականը պահանջելու, որպես աջակիցներ կարողացել էր մոբիլիզացնել գեյերի և լեզբիների պաշտպան կազմակերպություններին։ Վերջիններս էլ իրենց շահառուներին էին բերել իրենց հետ։
Սևան Աղաջանյանի կազմակերպած ակցիան ընդդեմ Զարուհի Փոստանջյանի միասեռականների քաղաքական ակցիան շոու որակելու նպատակ ուներ, փաստորեն։ Ընդ որում, երիտասարդները բավականին թեթև էին վերաբերվում ակցիային ու Զառային առհասարակ։ Ոչ մի լարվածություն, փոփ-քորն ու ժպիտներ։ Հետաքրքիր զարգացումներ են փաստորեն ձևավորում քաղաքապետարանի շուրջ։ Վերջում էլ երիտասարդները «Զառիվայր» ու «Զառաշոու» փուչիկները պայթեցրեցին ու հեռացան։ Փուչիկը պայթեց, բովանդակության բացակայությունն ու դատարկությունը երիտասարդները ժպիտով ճամփեցին։
