Հայերի ուսերից կարծես ահռելի բեռ են հանել. Ուիլյամ Օսթինը՝ թաշվյա հեղափոխությունից հետո Հայաստանի մասին
ՀԱՍԱՐԱԿՈՒԹՅՈՒՆ
Starkey Hearing Foundation-ը բարեգործական նպատակով առաջին անգամ Հայաստան այցելեց 2017-ի հոկտեմբերին եւ թույլ լսող մարդկանց լսողական սարքեր բաժանեց: Այցից երկար ժամանակ չի անցել, սակայն երկրում շատ բան է փոխվել. հեղափոխություն տեղի ունեցավ, որը թավշյա անվանեցին: 2017-ի եւ 2018-ի Հայաստանի միջեւ տարբերությունը զգաց նաեւ Starkey Hearing Foundation-ի հիմնադիր Ուիլյամ Օսթինը: Նրա խոսքով՝ աժյմ մարդիկ այնպիսի տեսք ունեն, կարծես իրենց ուսերից ահռելի բեռ են հանել:
«Հայերի դեմքին, հատկապես երիտասարդների, ես ուրախություն եմ տեսնում եւ դա շատ հաճելի է: Մարդիկ կարծես թե սկսել են հավատալ ապագային», -NEWS.am Medicine- հետ զրույցում ասել է Ուիլյամ Օսթինը:
Ճիշտ է, Օսթինին հայերը դուր եկան նաեւ առաջին այցելության ժամանակ. նրանք ընկերասեր, հոգատար, երախտապարտ, բարեհամբույր եւ համբերատար թվացին: Նրա խոսքով՝ Հայաստանում աշխատելը հաճույք է եւ այստեղ նրան եւ նրա գործընկերներին անգամ ավելի հաճելի է, քան աշխարհի լավագույն լողափերին:
Այս անգամ այցի ընթացքում Ուիլյամ Օսթինը հանդիպեց Հայաստանի նախագահ Արմեն Սարգսյանի հետ, իսկ Տանի Օսթինը՝ Ուիլյամ Օսթինի կինը հանդիպեց նոր վարչապետ Նիկոլ Փաշինյանի հետ:
«Հայաստանի նոր կառավարությունը պատրաստ է համագործակցությանը եւ դա շատ հաճելի է: Մեզ օգնություն են առաջարկում, մեզ համար անում են հնարավոր ամեն ինչ: Նախագահը շատ բարեհամբույր էր, հիվանդների լսողական սարքերի սպասարկման կազմակերպման համար մեզ համար մշտական վայր առաջարկեց: Մենք նրան այդ մասին չէինք խնդրել, նա ինքն առաջարկեց», - պատմել է Ուիլյամ Օսթինը:
Հիշեցնենք, որ Starkey Hearing Technologies ընկերությունը, որը պատկանում է Օսթին ամուսիններին, զբաղվում է լսողական սարքերի արտադրությամբ: Վաճառքից ստացված եկամուտների մի մասով իրականացվում է «Որպեսզի աշխարհը կարողանա լսել» կարգախոսով բարեգործական առաքելությունը:
Հայաստանը 107-րդ երկիրն է, ուր այցելել է բարեգործական առաքելությունը: 2017-ին Հայաստանի 1800 անապահով երեխաներ եւ մեծահասակներ լսողական սարքեր ստացան, իսկ այս տարի նախատեսվում է եւս 1200 մարդու նման սարքերով ապահովել:
Օսթինի խոսքով՝ 2019-ին հիմնադրամը անապահովների համար անվճար լսողական սարքերի նոր խմբաքանակով մտադիր է նորից Հայաստան վերադառնալ:
