Նիկոլայ Բաղդասարյան. «Եթե մայիսի 8–ին կրկին վարչապետ չընտրվի, ապա երկիրը կմտնի ավելի խորը ճգնաժամի մեջ». «Փաստ»
ՀԱՍԱՐԱԿՈՒԹՅՈՒՆ«Փաստ» օրաթերթը գրում է.
Արդեն հայտնի է, որ մայիսի 8–ին ԱԺ–ում տեղի կունենա վարչապետի թեկնածուի ընտրության երկրորդ փորձը: Ու չնայած դժվար է ասել, թե ՀՀԿ–ն այս անգամ ինչպես իրեն կդրսևորի, սակայն հետաքրքիր է, թե օրենքով երկրորդ անգամ ինչպես է իրականացվելու ընտրությունը:
Փաստաբան Նիկոլայ Բաղդասարյանը «Փաստ»–ին փոխանցեց, որ ըստ գործող Սահմանադրության, վարչապետի թեկնածուի երկրորդ անգամ առաջադրումը պետք է իրականացվի ոչ թե ԱԺ խմբակցությունների, այլ պատգամավորների 1/3–ի կողմից:
«Այս դեպքում նույնպես, առաջադրված թեկնածուն որպեսզի համարվի ընտրված, պետք է նրա օգտին քվեարկի 53 պատգամավոր: Ինձ հասած տեղեկությունների համաձայն, սակայն, ևս երկու պատգամավոր ՀՀԿ խմբակցությունից դուրս գալու դիմում է ներկայացրել: Այսինքն, ՀՀԿ–ն սեփական թեկնածուին առաջադրելու դեպքում անգամ չի կարողանա ապահովել անցողիկ ձայների քանակը»,– ասաց Ն. Բաղդասարյանը:
Ըստ նրա, այս պահին պարալիզացված է նաև ողջ դատական համակարգի աշխատանքը:
«Դատական նիստեր տեղի չեն ունենում, և այս ամենը վկայում է, որ ըստ էության պարալիզացվել է պետության արդարադատություն իրականացնող համակարգը: Հետևաբար այս իրավիճակը չի կարող 1–2 օրից ավել շարունակվել»,– ասաց Ն. Բաղդասարյանը:
Հարցին, թե մինչև մայիսի 8–ը ՀՀԿ–ն ուրիշ ինչ այլ սցենարներով կարող է շարժվել, փաստաբանն ասաց, որ ՀՀԿ–ն միայն մի ելք ունի:
«Ըստ էության ՀՀԿ–ն այս պահին ընդամենը մի քանի օլիգարխներ են, որոնք ցանկանում են պահպանել իրենց դիրքերը: Պետք է նշել նաև, որ ՀՀԿ–ի կողմից թեկնածու չառաջադրելու պարագայում ՀՀԿ–ի թեկնածուն շարունակում է պաշտոնավարել այնքան ժամանակ, մինչև նոր առաջադրված թեկնածուն չհաղթի: Այսինքն, տապալելով վարչապետի ընտրության գործընթացը, ՀՀԿ–ն փաստացի պահպանում է իր թեկնածուի պաշտոնավարման ժամկետը»,– ասաց Ն. Բաղդասարյանը:
Փաստաբանի տեղեկացմամբ` մայիսի 8–ին, եթե կրկնվի նույն սցենարը, և փաստացի կրկին տապալվի վարչապետի ընտրությունը, ապա ողջ երկիրը կմտնի ավելի խորը ճգնաժամի մեջ, որի ժամանակ անգամ խորհրդարանական ընտրություն կազմակերպել հնարավոր չի լինի:
«Այդ դեպքում արդեն ընտրություն չի կայանա, քանի որ պարալիզացված կլինեն բոլոր պետական համակարգերը»,– խոսքը եզրափակեց փաստաբանը:
Շարունակությունը՝ «Փաստ» օրաթերթի այսօրվա համարում
