Վարուժան Ավետիսյանի կոչը երիտասարդությանը «Վարդաշեն» ՔԿՀ-ից

«Սասնա ծռեր»-ի խոսնակ Վարուժան Ավետիսյանը «Վարդաշեն» ՔԿՀ-ից կոչ է ուղղել երիտասարդությանը:

Ավետիսյանի խոսքով՝ «թրքաբարո վարչախումբը ոտնահարել է մեր բոլոր սրբությունները. միայն այն, որ հայ ազատագրական զինյալ պայքարի ռահվիրաններից մեկը՝ Մոնթե Մելքոնյանի մտերիմ ընկեր եւ գաղափարա-քաղաքական գործիչ Ալեք Ենիգոմշյանը շինծու մեղադրանքով կալանավորված է, խոսում է Հայաստանում թրքաբոլշեւիկյան տիրապետության մասին»:

Ըստ նրա՝ Ալեք Ենիգոմշյանը մեր դարավոր ոսոխի դեմ զինյալ ազատագրական պայքարի ընթացքում կորցրել է տեսողությունը եւ ձեռքը, սակայն մնացել է Հայրենիքի պաշտպանության դիրքերում եւ որպես հայի անկոտրում ոգու օրինակ ու հաղթանակի փարոս բոլորիս համար: «Եթե բանտարկված է Ալեք Ենիգոմշյանը, ուրեմն, բանտարկված է Հայրենիքը, նրա ազատությունն ու արժանապատվությունը: Հայ երիտասարդություն, դու չես կարող գլուխդ բարձին դնել եւ ապրել առօրյա կյանքով, քանի դեռ Ալեքը տանջվում է չեկիստական բանտում»,- հայտարարել է Վարուժան Ավետիսյանը:

Նա «Սասնա ծռեր» խմբավորման անունից եւ Ալեքի հայրենանվեր կենսագրության հանդեպ պարտքի իրավունքով» կոչ է արել ոտքի ելնել եւ օր ու գիշեր հանգիստ չտալ »թրքաբարո վարչախմբին եւ պարտադրել, որ նա ազատ արձակի մեր կենդանի լեգենդին»: