«Երևան 2800»-ի ընթացքում կանկացվի փառատոն, որին կմասնակցի 2800 մայր՝ իրենց երեխաներով և մանկասայլակներով. Ռուբեն Հովհաննիսյան

«Իրավունքի» «Ուղիղ կապ» խորագրի հյուրն էր Երեւանի քաղաքապետարանի աշխատակազմի մշակույթի վարչության պետ ՌՈՒԲԵՆ ՀՈՎՀԱՆՆԻՍՅԱՆԸ: Մեր ընթերցողների եւ ֆեյսբուքյան օգտատերերի կողմից հնչած հարցերի մեծ մասը վերաբերում էին Երեւանի հիմնադրման 2800-ամյակի միջոցառումներին, ինչպես նաեւ քաղաքապետարանի պատասխանատվության տակ գտնվող մշակութային հաստատություններում առկա իրավիճակին:

ՓԱՌԱՏՈՆ, ՈՐԻՆ ԿՄԱՍՆԱԿՑԻ 2800 ՄԱՅՐ` ԻՐԵՆՑ ԵՐԵԽԱՆԵՐՈՎ ՈՒ ՄԱՆԿԱՍԱՅԼԱԿՆԵՐՈՎ

– Կասե՞ք, թե երբվանից կմեկնարկեն 2800-ամյակի բուն միջոցառումները, թե՞ այն կնշվի ընդամենը մեկ օր: Եվ մոտավորապես որքա՞ն զբոսաշրջիկ եք նախատեսում հյուրընկալել մայրաքաղաքում: (ԷԴԳԱՐ ՊԵՏՐՈՍՅԱՆ)

– Կարող ենք հիմք ընդունել, որ մեկնարկը լինելու է հունիսի 1-ին, որովհետեւ այդ օրը մեծ փառատոն է նախատեսվում, որին մասնակցելու են 2800 մայր` իրենց երեխաներով եւ մանկասայլայներով: Բավական հետաքրքիր ծրագիր է սպասվում, որն ավարտվելու է Հանրապետության հրապարակում մեծ համերգային ծրագրով եւ այլ տեխնիկական հնարքներով: Ունենք գլխավոր միջոցառումներ, որոնք լինելու են սեպտեմբերի 25-ին, այն թատերականացված ներկայացում է` նվիրված Երեւանի հիմնադրման օրվան` «Էրեբունու հառնումը» խորագրով: Եվ, իհարկե, Հայաստանի Հանրապետության հրապարակում կլինի գալա համերգ: Բայց սեպտեմբերի 30-ից հետո` ծրագիրը շարունակվելու է մինչեւ տարվա վերջ, որովհետեւ ամբողջ տարին ենք նշելու Երեւանի հիմնադրման 2800-ամյակը: Ուստի` բոլոր միջոցառումները հատուկ են եւ շատ կարեւոր: Ինչ վերաբերում է նրան, թե որքան հյուրեր ենք նախատեսում ընդունել, այս պահին բարդ է ասել` գուցե մի քանի 100 հազար, գուցեեւ մեկ միլիոնից ավելի:

– Պարոն Հովհաննիսյան, «Երեւանյան ամառ 2018» ծրագիրն ինչո՞վ կտարբերվի նախորդ տարիներից` հաշվի առնելով, որ այս տարին հոբելյանական է: (ՌՈՒԶԱՆՆԱ ԴԻԼԱՆՅԱՆ)

– Այն այս տարի կառանձնանա իր ծավալներով, գույներով եւ մոտեցումներով, քանի որ, իսկապես, սա հոբելյանական տարի է: Երեւանյան ամառ ծրագիրն արդեն 6-րդ տարին է, որ իրականացվում է: Դեռ առաջին տարիներից սկսած` միջոցառումներ էինք անում, որոնք հետագայում դարձան ավանդական եւ ունեցան փառատոնային տեսք, այդ թվում` Խոսող խաղալիքը, Գարեջրի, Ձմերուկի փառատոնը, Տարազ ֆեստը, բոլոր եկեղեցական տոները եւ այլն: Միայն անցած տարի ,Երեւանյան ամառ» ծրագրի շրջանակներում 3 ամսվա ընթացքում իրականացրինք 91 բացօթյա եւ փակ միջոցառում, որոնց ակտիվ մասնակցություն է ունեցել հենց ինքը` բնակիչը: Այսօր ամենաերջանիկ մարդկանցից ենք, որովհետեւ հենց մեզ է բախտ վիճակվել, որպեսզի կազմակերպենք եւ ներկա լինենք այս փառահեղ տարվա միջոցառումներին: Եվ 2018-ը ոչ միայն արժեւորվում է երեւանցու, այլ ընդհանրապես` հայ ազգի կյանքում` Երեւանի հիմնադրման հոբելյանով, Առաջին հանրապետության եւ Սարդարապատի հերոսամարտի 100-ամյակներով:  Ավելացնեմ նաեւ, որ անմիջապես ,Էրեբունի-Երեւան» տոնակատարություններից հետո` հոկտեմբերի 9-14-ը նաեւ ֆրանկոֆոն քաղաքների 17-րդ գագաթնաժողովն է անցկացվելու, եւ կրկին մեզ է պատիվ տրված, որպեսզի ընդունենք տարբեր ազգերի, երկների պատվիրակություններին:

– Մայրաքաղաքը նախապատրաստվում է իր ծննդյան հոբելյանին եւ, բնականաբար, հյուրեր կլինեն նաեւ գործընկեր քաղաքներից: Ի՞նչ քայլեր է անում քաղաքապետարանը` գործընկեր քաղաքներում մեր մշակույթը ներկայացնելու հետ կապված: (ԼԻԼԻԹ ՍԱՐՀԱԹՅԱՆ)

– Երեւանի քույր եւ գործընկեր քաղաքները 50-ից ավելին են, եւ բոլորի հետ մեր արտաքին կապերի վարչությունը տանում է աշխատանք: Ասեմ, որ արդեն 2800-ամյակի շրջանակում մեր շրջիկ ցուցահանդեսները մեկնարկել են: Մարտի 29-ին Բեյրութում` Լիբանանում, բացվեց մեր առաջին ցուցահանդեսը` ,Երեք հանրապետությունների մայրաքաղաք» խորագրով` նվիրված Երեւանի հոբելյանին: Այն շատ մեծ շուքով բացվեց դեսպանատանը եւ նմանատիպ ցուցահանդեսներ կլինեն նաեւ այլ քաղաքներում: Պարբերաբար, այս կամ այն քաղաքում Երեւանի օրեր են անցկացվում: Օրինակ, 2017 թվականին անցկացրել ենք ե՛ւ Մոսկվայի օրերը Երեւանում, ե՛ւ Երեւանի օրերը Մոսկվայում, ինչպես նաեւ Սանկտ Պետերբուրգի օրերը Երեւանում եւ հակառակը: Այսինքն` մշակութային կապը կա, եւ գնալով միջազգային այդ կապերն ավելի են ընդլայնվում: Իմ տեղեկատվությամբ` նաեւ այս տարի բավականին հայտեր կան տարբեր քաղաքներից, որ ցանկություն են հայտնել կրկին գործընկերային եւ կամ քույր քաղաքի կարգավիճակում հայտնվել Երեւանի բարեկամական ցանկում:

– Երբ կարող եմ փոքրիկներիս տանել կենդանաբանական այգի, ավելի կոնկրետ` ե՞րբ են ավարտվելու կենդանաբանական այգու շինարարական աշխատանքները: (ԻՆԵՍԱ ՍԱՐԳՍՅԱՆ)

– Կենդանաբանական այգու շինարարական աշխատանքներն ավարտվել են ապրիլի 1-ին, եւ մեծ համերգային ծրագրով ազդարարել ենք գարնանամուտը: Կենդանաբանական այգին գործում է եւ աշխատում է ամեն օր` անկախ տարվա եղանակներից: Հուրախություն բոլորի` ասեմ, որ կենդանաբանական այգին արդեն երրորդ շինարական փուլն է անցնում, որի աշխատանքները սկսվել են դեռեւս 2012 թվականից: Եվ երրորդ շինարարական փուլն ավարտելուց հետո` հունիսի 1-ին մենք կրկին այնտեղ մեծ միջոցառում ենք ունենալու: Ասեմ, որ այնտեղ արդեն նոր ճեմուղիներ ունենք, կարող եք այցելել եւ վայելել: Ունենք նաեւ գայլերի, արջերի եւ առյուծների նորովի ազատավանդակներ, որոնք եւս նոր շուք, հմայք եւ ուրախություն են պատճառել երեխաներին: Ամեն ինչ ապահով է, գեղեցիկ եւ նորովի:

– Պատանի հանդիսատեսի թատրոնը նոր գեղարվեստական ղեկավար ունի, հետաքրքիր է` գո՞հ եք Դավիթ Հարությունյանի աշխատանքից: (ԿԱՐԻՆԵ ՎԱՐԴԱՆՅԱՆ)

– Նա արդեն մեկ ներկայացում բեմադրել է, որի պրեմիերան եղավ ընդամենը 10-15 օր առաջ, ասում են` բավականին հաջողված ներկայացում էր, ցավոք, գործուղման եմ եղել եւ ներկա չէի, բայց իմ կոլեգաները, մշակույթի վարչության աշխատակիցները ներկա էին: Սպասում եմ նոր ներկայացմանը, որպեսզի գնամ տեսնեմ իր աշխատանքը: Ընդհանուր առմամբ` Դավիթ Հարությունյանին անձամբ ճանաչում եմ, երկար տարիներ միասին ունեցել ենք ծավալած աշխատանքներ, եւ եթե բնութագրեմ նրան, ապա պետք է ասեմ, որ շատ պատրաստակամ, բավականին ավյունով, հետաքրքիր նախաձեռնություններով երիտասարդ է:

– Ի դեպ, նա նշանակվել է մեկ տարի ժամկետով: Ի՞նչ պետք է հասցնի անել այդ մեկ տարվա ընթացքում:

– Կարծում եմ` նման կոչումը, որ իրեն տրվել է` ղեկավարելու թատրոնը այդ տարիքում, դրա համար, իհարկե, ժամանակ է պետք: Անկեղծ ասեմ, յուրաքանչյուր մարդու համար սա շոկային ինչ-որ վիճակ է: Մարդիկ պետք է անցնեն այդ շոկային վիճակը եւ կենտրոնանան աշխատանքի վրա: Ամեն դեպքում, Դավիթն այն մարդն է, որը զգում է իր պատասխանատվության աստիճանը, պարտականությունները` հայ թատրոնի եւ կոնկրետ հենց Պատանի հանդիսատեսի թատրոնի հանդեպ, որտեղ մարդիկ ավելի երկար տարիների փորձ ունեն: Ուստի` Դ. Հարությունյանին ժամանակ է պետք, որպեսզի իր մտքերը հավաքագրի, ուժերը եւ էներգիան կենտրոնացնի եւ իրականացնի այն աշխատանքները, որոնք ակնկալում են ոչ միայն տվյալ թատրոնի դերասանները կամ մեր հանրությունը, հանդիսատեսը, այլ նաեւ մենք, որովհետեւ վստահել ենք իրեն:

– Կրկին վերադառնալով 2800-ամյակին` եւս մեկ հարց. բոլորի սպասումներն այս տարի մեծ են Երեւանի քաղաքապետարանից` իրականացվող միջոցառումների առումով: Իսկ ի՞նչ ակնկալիքներ ունի քաղաքապետարանը երեւանցիներից: («ԻՐԱՎՈՒՆՔ»)

– Առաջին հերթին` ակտիվ մասնակցություն, համբերություն, բարձր տոնական տրամադրություն: Մենք` կազմակերպիչներս, կարիք ունենք ոչ միայն ինչ-որ խմբերի, կազմակերպությունների, որպեսզի կարողանանք այս ամբողջ ծրագիրն իրականացնել, այլ հենց բնակչի` իր ժպիտով, իր ծափահարություններով, բայց ամենակարեւորը` իր ներկայութամբ:

ՀՐԱՆՏ ՍԱՐԱՖՅԱՆ

Հ.Գ.- Առավել մանրամասն դիտեք տեսանյութում.