Մոտեցան, հարցրին ու սկսեցին ծեծելը. Հարություն Աղլամազյանին դաժան ծեծի են ենթարկել
ՊԱՏՄՈՒԹՅԱՆ ԱՅՍ ՕՐԸ
«Հիմնադիր խորհրդարանի» անդամ Հարություն Աղլամազյանին այսօր` օգոստոսի 5-ին, իրենց շենքի դիմաց երեք երիտասարդ դաժան ծեծի են ենթարկել: NEWS.am-ի հետ զրույցում Հարություն Աղլամազյանի հայրը` Կարեն Աղլամազյանը, պատմեց, որ Հարությունին այսօր որպես վկա տեղափոխել էին ՀՔԾ, գիշերը ժամը 1-ի սահմաններում, երբ Հարությունը տուն է վերադարձել, հարձակվել են նրա վրա եւ ծեծի ենթարկել:
«Զանգեց ասաց, որ գալիս ա, ասացի՝ Հարություն, սպասի, գամ քեզ դիմավորեմ, սիրտս վկայում էր: Արդեն շենքի մոտ էր հասել, երեք տղա մոտեցան, հարցրին` Հարությունը դու ես, ասաց` հա ու սկսեցին ծեծելը: Մինչեւ մեկի ձեռքից էի առնում, մյուսն էր ծեծում: Օգնություն կանչեցի, հետո «Շտապօգնություն», հիմա «Էրեբունի» հիվանդանոցում ենք,սպասում ենք, որ հետազոտվի»,-պատմեց Հարությունի հայրը:
Ավելի վաղ տեղեկացրել էինք, որ «Հիմնադիր Խորհրդարան»-ի անդամ Հարություն Աղլամազյանին օգոստոսի 4-ին, տեղափոխել են Հատուկ քննչական ծառայություն, որպեսզի ցուցմունք տա վկայի կարգավիճակում:
Նշենք, որ Արմեն Մարտիրոսյանի, Անդրիաս Ղուկասյանի, Դավիթ Սանասարյանի կալանավորումից հետո, Հարություն Աղլամազյանն էր Երեւանի Ազատության հրապարակից վարում հավաքներն ու երթը:
