Համաքաղաքային ծառատունկն այն օրն է, երբ բոլորս միասին պետք է մասնակցություն ունենանք մեր քաղաքի կանաչապատման գործին

Shabat.am-ը գրում է.

Shabat.am-ը շարունակում է անդրադառնալ Երևանում իրականացվող այն ծրագրերին ու խնդիրներին, որոնց վերաբերյալ հաճախ է  բնակիչների կողմից տարբեր հարցադրումներ ստանում: Այս անգամ մեր զրույցը Երևանի քաղաքապետարանի աշխատակազմի կոմունալ տնտեսության վարչության պետ Հրայր Անտոնյանի հետ է:

 -Պարոն Անտոնյան, դուք ղեկավարում եք մի ոլորտ, որտեղ իսկապես անելիքներ շատ կան: Սկսենք բազմաբնակարան շենքերից: Հարցս հետևյալն է. այդ շենքերում առկա խնդիրների լուծման հարցում, ի վերջո ո՞վ է պատասխանատու:

 - Որպեսզի մեր համաքաղաքացիների համար հստակ լինի այս հարցի պատասխանը, ապա մեկ անգամ ևս նշեմ, որ յուրաքանչյուր բազմաբնակարան շենքում իրականացվող աշխատանք համատիրությունների պարտականությունն է: Երևանի քաղաքապետարանի կողմից վերոնշյալ աշխատանքներին մասնկացությունը կամավոր լիազորություն է, որը Երևանի քաղաքապետի հանձնարարությամբ իրականացվում է համատիրություններին ու բնակիչներին աջակցելու և բազմաբնակարան բնակելի շենքերում առկա խնդիրներին համատեղ լուծումներ տալու համար:

-Իսկ ի՞նչ արդյունքներ ունենք այդ աջակցության արդյունքում: Որքանո՞վ է քաղաքապետարանն օգնում  համատիրություններին ու բնակիչներին:

- Մայրաքաղաքի բազմաբնակարան բնակելի շենքերի պահպանման և հետագա շահագործման ծրագրի շրջանակում 2017թ. ընթացքում համայնքային բյուջեով և համատիրությունների միջոցներով իրականացվել են 95530քմ. հարթ և 45740 քմ թեք տանիքների նորոգման աշխատանքներ: Մուտքերի վերանորգման աշխատանքներն իրականացվում են ինչպես համայնքային բյուջեի և համատիրությունների միջոցների հաշվին, այնպես էլ ծրագրին մասնակցություն է ունենում «Հաբիթաթ ֆոր հյումենիթի Արմենիա» հիմնադրամը: Միայն 2017թ. ընթացքում մայրաքաղաքում նորոգվել է 1432 մուտք:

-Երևանում այսօր հաճախ բարձրացվող հարցերից են նաև  ջրամատակարարման և ջրահեռացման հետ կապված խնդիրները: Ի՞նչ աշխատանքներ եք տանում այս ուղղությամբ:

- Երևանում ջրամատակարարման և ջրահեռացման հետ կապված ծրագրերն այսօր ադեն իրականացվում եմ եռակողմ համաձայնության շրջանակում (Երևանի քաղաքապետարան,  «Վեոլիա Ջուր» ՓԲԸ և ՀՀ ջրային տնտեսության պետական կոմիտե):   2017թ. ընթացքում «Վեոլիա Ջուր» ընկերության կողմից վարկային ծրագրով իրականցվել են 37 փողոցների ջրամատակարարման խողովակների փոխարինման և 29 կմ ջրահեռացման ցանցի կառուցման աշխատանքներ: Որպես ոլորտում կատարված աշխատանքների ցուցիչ, պետք է նշեմ, որ այսօր շուրջօրյա ջրամատակարարմամբ է ապահովված Երևանի 84 %-ը, այն, ի դեպ, 2014թ. կազմել է 70 %:

-Իսկ ի՞նչ ծրագրեր են նախատեսված 2018թ. ընթացքում: Ի՞նչ փոփոխությունների ականատեսը կլինեն բնակիչները:

- Ասեմ, որ բոլոր այն ծրագրերը որոնք ներկայացրեցի թե տանիքների, թե մուտքերի նորոգման, ինչպես նաև ջրամատակարարման ու ջրահեռացման հետ կապված, բոլորը լինելու են շարունակական նաև այս տարի: Կատարված աշխատանքների ծավալն ու կարևորությունը ընդգծելու համար, պարզապես մի քանի օրինակներ բերեմ:  Եթե 2014թ. մայրաքաղաքում վերանորոգվել է 860 մուտք, ապա այս տարի նախատեսել ենք 1615 մուտքի նորոգում, ինչը ամենաբարձր ցուցանիշն է, որ երբևէ իրականացվել է մուտքերի նորոգման ծրագրի շրջանակում: 2018թ. մայրաքաղաքում նախատեսվում է իրականացնել 49 փողոցների ջրամատակարարման ցանցի և ներտնային ջրամիացումների հաշվիչների տեղադրման, ինչպես նաև ջրահեռացման համակարգերի վերակառուցման աշխատանքներ: Այս տարի ամբողջությամբ կլուծվի Երևանի Լուկաշինի փողոցի կոյուղատար համակարգի հետ կապված խնդիրը: Պետք է նշեմ, որ այդ մեծ թաղամասը կառուցման օրվանից ի վեր, երբևէ կոյուղի չի ունեցել:

-Պարոն Անտոնյան, Երևանում սանմաքրման և աղբահանության աշխատանքներն իրականացնում է «Սանիթեք»  ընկերությունը: Առաջին հերթին որպես Երևանի բնակիչ, գոհ ե՞ք այդ աշխատանքներից:

-Նախ խոսեմ, որպես Երևանի բնակիչ: Երբ առավոտյան դուրս ես գալիս աշխատանքի, անհնար է չնկատել, որ մայրաքաղաքի փողոցները մաքրված են, լվացված, բայց  չանցած մի քանի ժամ այլ տեսարանի ես ականատես լինում: Մենք պետք է գիտակցաբար մոտենանք այս խնդրին և հասկանանք, որ Երևանը մեր մեծ տունն է և ինչպես մեր բնակարանն ենք մաքուր պահում, այդպես էլ պետք է մայրաքաղաքը մաքուր պահենք: Համոզված եմ, որ եթե յուրաքանչյուր բնակիչ իր հերթին մաքուր պահի և չաղտոտի քաղաքը, ապա Երևանը հաստատ շատ մաքուր կլինի:

-Ի՞սկ որպես պաշտոնյա և ոլորտի պատասխանատու, ըստ Ձեզ, ի՞նչ է հարկավոր արդյունքի հասնելու համար:

-Գիտեք ինչ, աղբահանության աշխատանքների ուղղությամբ աշխատանքներն ամենօրյա են, հսկողությունն էլ՝ մշտական: «Սանիթեք»  ընկերությունը շարունակում է աղբահանության նոր տեխնիկա ձեռք բերել, մշտապես թարմացվում են մայրաքաղաքում տեղադրված աղբամանները, որոնք շատ հաճախ վնասվում են հենց քաղաքացիների անփույթ վերաբերմունքի հետևանքով: Սակայն, որքան էլ սանմաքրման աշխատանքներ իրականացվեն, որքան էլ նոր աղբամաններ տեղադրվեն կամ նոր տեխնիկա ներկրվի, միևնույն է, եթե բնակիչները մաքուր չպահեն քաղաքը՝ լիարժեք արդյունքի չենք հասնի: Օրինակ 2017թ. շուրջ 960 արձանագրություն  է կազմվել արգելված վայրում շինարարական աղբ թափելու մասով: Բայց հավատացած եղեք, մեր նպատակը ամենևին էլ արձանագրություն կազմելն ու  բնակիչներին տուգանելը չէ: Մեր նպատակն է, որ մեր բնակիչներն աղբը թափեն միայն սահմանված վայրերում:

-Պարոն Անտոնյան, մարտի 31-ը մայրաքաղաքում հայտարարված է համաքաղաքային շաբաթօրյակի և ծառատունկի օր:  Նախապատրաստական ի՞նչ աշխատանքներ են տարվել:

- Երևանի տարբեր վարչական շրջաններում արդեն իսկ ընտրվել են հստակ տարածքներ, որտեղև իրականացվելու են ծառերի տնկման աշխատանքներ: Շաբաթօրյակի շրջանակում էլ պատշաճ տեսքի կբերվեն հանրային օգտագործման տարածքները՝ բակերը, այգիներն ու պուրակները, ինչպես նաև հասարակական նշանակության կառույցների և ճանապարհների հարակից գոտիները: Պետք է նշեմ, որ բոլոր ցանկացողները կարող են միանալ այս նախաձեռնությանը: Մասնակիցներին մեր կողմից կտրվեն բահեր, ձեռնոցներ, պարկեր և անհրաժեշտ այլ պարագաներ: Կարծում եմ սա այն օրն է, երբ բոլորս միասին պետք է մասնակցություն ունենանք մեր քաղաքի կանաչապատման ու մաքրման գործին: