Հարձակում բժշկի վրա. Գյումրիում դիմակավոր հանցագործներն ավելի ու ավելի են ակտիվանում
ԱՄԵՆԱԸՆԹԵՐՑՎԱԾ
Երեկ առավոտյան դիմակավորված անձանց կողմից իր տան բակում հարձակման է ենթարկվել «Գյումրու Վ. Աբաջյանի անվան ընտանեկան բժշկության կենտրոն» ՓԲԸ տնօրեն Արտուշ Ասատրյանը: Մարմնական վնասվածքներ ստացած բժիշկը տեղափոխվել է Գյումրու բժշկական կենտրոն: Վերջինիս տնօրեն Արմեն Իսահակյանը մեզ հետ զրույցում ասաց, որ տուժածի վիճակը գնահատվում է միջին ծանրության: «Կատարվել են բոլոր հետազոտությունները: Նաեւ վիրահատարանում ստուգվել է վերքը: Պարզվել է` ձախ կրծքավանդակի շրջանում սուր ծակող կտրող գործիքից առաջացած վերք է, որը թափանցել է, սակայն թոքը չի վնասել: Հարվածը կարծես կողքից է եղել: Նաեւ սալջարդեր կան ձեռքի վրա, գլխի շրջանում, որոնք մշակվել են: Այս պահին նա գտնվում է վերակենդանացման բաժանմունքում` բժիշկների հսկողության տակ: Պարբերաբար հսկելու են, տեսնեն դրենավորման կարիք կա՞»,- տեղեկացրեց բուժկենտրոնի ղեկավարը: Նաեւ հավելեց, որ Արտուշ Ասատրյանին վիրահատելու անհրաժեշտություն բժիշկներն այս պահին չեն տեսնում եւ նրա կյանքին վտանգ չի սպառնում:
Ավելի ուշ տեղեկացանք, որ մարմնական վնասվածքներ ստացած բժիշկը տեղափոխվել է հիվանդասենյակ, եւ որ բժիշկները չեն արգելում նրա հետ զրուցել: Եղելությունը վերհիշելով` Արտուշ Ասատրյանն ասաց. «Ես դուրս եկա՝ գարաժները բացեի, մեքենան հանեի, որ գործի պիտի գնայի: Դիմացը` դարպասից մի քանի մետր այն կողմ «բեսեդկա» ունենք, պիտի մտնեի, այդ «բեսեդկայից» բան վերցնեի: Տեսա, որ կանգնած են երկու հոգի` դիմակավոր, վերից մինչեւ ներքեւ սեւ հագած: Մենակ աչքերն էին երեւում, ուրիշ ոչ մի բան: Ես որ տեսա, անակնկալի եկա, բնական է, ու արդեն սկսվեց հարվածների տարափը գլխիս: Փայտով խփում էին երկուսով: ...Հետո ես, ըստ երեւույթին, ընկել եմ, հիշում եմ, որ ոտքով էին խփում կրծքավանդակիս: Թե հիմա ոտքով են խփել, պատռել կողիս շրջանում, թե դանակով են խփել, չեմ կարող ասել: Ես արդեն բնական է, կորցրել էի ինձ»:
Գյումրու Վ. Աբաջյանի անվան ընտանեկան բժշկության կենտրոնի տնօրենի փոխանցմամբ, իր վրա հարձակվողները բացարձակ ոչ մի բառ չեն արտաբերել, որեւէ խոսակցություն չի եղել, որը կարող էր ինչ-որ չափով հուշել կատարվածի դրդապատճառների մասին: «Վատություն որ ոչ մեկի չեմ արել: Ընդամենը երեւի սպասում էին, որ դուրս գայինք, գողություն անեին»,- ենթադրեց Ասատրյանը: Մասնագիտական գործունեության հետ նույնպես տեղի ունեցածը բժիշկը չի կապում: «Բացարձա՛կ»,- ասաց նա:
ՀՀ քննչական կոմիտեի նախագահի խորհրդական Սոնա Տռուզյանից տեղեկացանք, որ դեպքի առթիվ հարուցվել է քրեական գործ՝ ՀՀ քրեական օրենսգրքի 112-րդ հոդվածի 2-րդ մասի 6-րդ կետի հատկանիշներով: Հոդվածը տվյալ դեպքում վերաբերում է մի խումբ անձանց կամ կազմակերպված խմբի կողմից առողջությանը դիտավորությամբ ծանր վնաս պատճառելուն: Նշված արարքի համար քրեական օրենսգիրքը որպես պատիժ նախատեսում է ազատազրկում՝ հինգից տասը տարի ժամկետով:
Ավելի ուշ քննչական կոմիտեն հաղորդագրություն տարածեց՝ ներկայացնելով որոշ մանրամասներ: Ըստ այդմ, իրավապահներին ահազանգել է Ասատրյանի կինը: «Անմիջապես դեպքի վայր է մեկնել քննչական-օպերատիվ խումբը։ Նախնական տվյալներով՝ Ա. Ասատրյանը 2016 թվականի մարտի 25-ին՝ ժամը 8.20-ի սահմաններում, տանից դուրս է եկել բակ: Րոպեներ անց կինը լսել է բարձր ձայներ եւ դուրս գալով բակ՝ տեսել, որ ամուսինն ընկած է գետնին, իսկ դիմակավորված երկու անձ մահակներով հարվածում են նրան: Կնոջը տեսնելով՝ դիմակավորված անձինք դիմել են փախուստի: ... Ստեղծվել է քննչական խումբ եւ ձեռնարկվում են անհրաժեշտ քննչական եւ դատավարական այլ գործողություններ՝ դեպքի բոլոր հանգամանքները, առերեւույթ հանցագործություն կատարած անձանց ինքնությունը պարզելու ուղղությամբ»,- մասնավորապես ասվում է հաղորդագրության մեջ։
Ի դեպ, բժշկի վրա կատարված հարձակումը գյումրեցիների մի մասին ստիպել է զուգահեռներ անցկացնել այդ եւ քաղաքում մի քանի օր առաջ տեղի ունեցած դեպքի միջեւ, որը նույնպես կապված էր դիմակավորված անձանց հետ: Մարտի 14-ի կեսգիշերին նրանք ներխուժել էին Անի թաղամասի Սախարովի անվան հրապարակում գտնվող բենզալցակայան եւ գումար պահանջել աշխատակցից, ապա ստանալով եղած ամբողջ գումարը՝ 37 հազար դրամ, հեռացել էին: Բենզալցակայանի աշխատակցին կողոպտիչները մարմնական վնասվածք չէին պատճառել:
Դրանից մոտավորապես մեկ ամիս առաջ էլ, դարձյալ Գյումրիում, դարձյալ դիմակ կրող անձի կողմից ու դարձյալ գումարի պատճառով տեղի էր ունեցել ավազակային մեկ այլ հարձակում: Այս անգամ թիրախում հայտնվել էր տնակում ապրող տարեց կինը: Նա առավոտյան դուրս էր եկել բակ, մաքրել ձյունը եւ երբ նորից ներս էր մտել, նրա հետեւից տնակ էր ներխուժել հանցագործը: Վերջինս դանակի հարված էր հասցրել կնոջը, ոտքերով ու ձեռքերով խփել կրծքավանդակին, ապա հափշտակել 65 հազար դրամ: Ավելի ուշ Գյումրու 30-ամյա մի բնակիչ ձերբակալվել է, խոստովանական ցուցմունք տվել ու կալանավորել:
Այս ֆոնին թերեւս հարկ է ընդգծել, որ նույնիսկ պաշտոնական թվերը վերհանում են նշված տարածաշրջանում ապրող մարդկանց սարսափելի ծանր սոցիալական դրությունը: Վերջին տվյալների համաձայն, Շիրակը Հայաստանի ամենաաղքատ մարզն է: Այստեղ աղքատության շեմից ներքեւ է գտնվում բնակչության ավելի քան 45 տոկոսը: Պատկերը տարբեր չէ նաեւ Գյումրիի դեպքում: Ի դեպ, աղքատ են գնահատվել այն ընտանիքները, որոնց սպառումը մեկ չափահաս անձի հաշվով ցածր է եղել աղքատության վերին` ընդհանուր գծից, այն է՝ 39 193 դրամից:
