Պավլիկ Մանուկյանը դատարանում ասել է՝ հանուն հայրենիքի զոհասեղանին է դրել անգամ իր 23-ամյա որդուն. փաստաբան

«Սասնա ծռերի» անդամ Պավլիկ Մանուկյանին հուլիսի 31-ին, իր նկատմամբ որպես խափանման միջոց կալանավորումն ընտրելու միջնորդության քննարկման ժամանակ նիստերի դահլիճում հուզիչ խոսք է ասել: Լրագրողների հետ զրույցում նրա պաշտպան Ինեսսա Պետրոսյանը նշեց, որ նիստերի դահլիճում Պավլիկ Մանուկյանը նշել է, որ նա հանուն հայրենիքի եւ ազգի զոհասեղանին է դրել անգամ իր 23-ամյա որդուն:

«Նրան պատգարակի վրա էին տեղափոխել եւ նա այնպիսի ուժեղ ելույթ ունեցավ, որ բոլորը հուզվել էին: Նա դատարանին ներկայացրեց այն ամենը, ինչից դրդված գնացել է այդ քայլին: Ասաց, որ հանուն հայրենիքի եւ ազգի համար չի խնայել ոչինչ, անգամ զոհասեղանին է դրել իր 23-ամյա որդուն»,-ասաց փաստաբանը:

Ավելի վաղ տեղեկացրել էինք, որ օգոստոսի 3-ին Պավլիկ Մանուկյանին, երկու ամսով կալանավորել են: Նրան դատարան էին տեղափոխել «Շտապօգնության» մեքենայով՝ պատգարակի վրա:

Հիշեցնենք, ըստ ոստիկանության հաղորդագրության, Պավլիկ Մանուկյանն եւ նրա որդին ոտքերի հատվածում հրազենային վիրավորում են ստացել ՊՊԾ գնդում տեղի ունեցած փոխհրաձգության հետեւանքով։ Հուլիսի 27-ին Պավլիկ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:

Ըստ մեղադրանք հոդվածների` մի դեպքում նախատեսվում է 6-12, մյուս դեպքում 3-8 տարվա ազատազրկում: