«Միայնակ Գայլին» հեռացրել են աշխատանքից

«Սասնա ծռեր» խմբի անդամ Արայիկ Խանդոյանի՝ «Միայնակ Գայլի» հարազատներից մեզ տեղեկություն է հասել այն մասին, որ նրան ՊՊԾ գնդի գրավման հաջորդ օրն իսկ աշխատանքից ազատել էն:

Արայիկ Խանդոյանը աշխատում էր գազի ներտնային սպասարկմամբ զբաղվող «Էյ Ի Ջի Սերվիս» ՍՊԸ-ում՝ որպես անվտանգության աշխատակից՝ պահակ: Ըստ մեզ հասած տեղեկությունների՝ ՊՊԾ գնդի գրավումից հետո ԱԱԾ-ն «լցվել է» հիշյալ ընկերություն ու համապատասխան գործողություններ իրականացրել, ինչից հետո ընկերության տնօրինությունը Խանդոյանին աշխատանքից ազատելու մասին որոշում է կայացրել:

Փորձեցինք տեղեկությունը ճշտել «Էյ Ի Ջի Սերվիսից», որտեղից մեզ հայտնեցին, որ Արայիկ Խանդոյանն իսկապես աշխատել է իրենց մոտ, սակայն նրա՝ աշխատանքից ազատվելու ու դրա պատճառների մասին տեղեկություններ հաղորդել չեն կարող, քանի որ այդ հարցրին կարող է պատասխանել Սերվիսի գլխավոր տնօերնը, ով Արսեն Հարությունյանն է: Վերջինս այժմ արձակուրդում է: Մեր առաջարկը՝ ընկերության կադրերի բաժնից ճշտել՝ արդյո՞ք Խանդոյանը ազատված է աշխատանքից, թե ոչ, արժանացավ նույն պատասխանին. «Այս եւ մյուս հարցերի վերաբերյալ իրավասու է պատասխանել միայն տնօրենը»:

Նկատենք, որ Հայաստանում մոնոպոլ դիրք ունեցող «Էի Ի Ջի Սերվիսի» փայատերերից մեկը Երեւանի երբեմնի քաղաքապետ, «ՀայՌուսգազարդ» ՓԲԸ նախկին տնօրեն Կարեն Կարապետյանն է, ով, ինչպես հայտնի է, Սերժ Սարգսյանի մտերիմներից է: Նշենք, որ Արայիկ Խանդոյանի՝ սոցիալապես ոչ բարվոք վիճակում ապրող ընտանիքին դրամական աջակցություն ցուցաբերելու համար հուլիսի 31-ից Gofundme.com կայքում դրամահավաք էր սկսվել, որի ընքացքում հավաքվեց շուրջ 30.000 ԱՄՆ դոլար:

Հանգանակությունները շարունակվում են նաեւ այժմ: Մեր տեղեկություններով՝ բազմաթիվ բարերարներ, որոնց մեջ են նաեւ սփյուռքի մեր հայրենակիցները, պատրաստակամություն են հայտնել ֆինանսապես աջակցել Խանդոյանների բազմազավակ ընտանիքին: Արայիկ Խանդոյանը 5 երեխա ունի, որոնցից ամենակրտսերը 8 տարեկան է:

Արայիկ Խանդոյանի ավագ եղբայրը՝ Հունանը, զոհվել է Արցախյան ազատամարտում, մյուս եղբայրը՝ Արթուր Խանդոյանը, պատերազմի վետերան է, այժմ ապրում է Հայաստանից դուրս, իսկ Արարատ Խանդոյանը, որի ներքին օրգանների մի մասը բացակայում են, հրաշքով է ողջ մնացել արցախյան ազատամարտի ժամանակ: Նրան մոտ մեկ շաբաթ առաջ մեղադրանք է առաջադրվել քրեական օրենսգրքի 225 հոդվածի 2-րդ մասի հատկանիշներով (զանգվածային անկարգություններին մասնակցելը): Արարատ Խանդոյանը կալանավորված է:

Նյութի աղբյուրը ` hraparak.am