Զարուհին շտապեց, բայց սխալ հասցեով
ՀԱՍԱՐԱԿՈՒԹՅՈՒՆ
Asekose.am կայքը գրում է.
Նուբարաշենի վթարված կոյուղին, որն առիթ էր դարձել Երևանի ավագանու այսօրվա նիստում «Երկիր Ծիրանի»-ի կողմից անցկացված աղմկահարույց ու վիճահարույց ակցիայի համար, պարզվում է որևէ կապ չունի Երևանի քաղաքապետարանի հետ:
Վթարված կոյուղու խնդիրը, որի խցանված լինելու պատճառով տարածքում ամենուր գարշահոտություն է և հակասանիտարական վիճակ, առնչություն չունի նաև «Վոոլիա Ջուր» փակ բաժնետիրական ընկերության հետ:
Խնդրի ու այդ առնչությամբ բարձրացված բողոքի միակ հասցեատերը Քրեակատարողական վարչությունն է, որի ենթակայությամբ գործող Նուբարաշեն քրեակատորղական հիմնարկն էլ պարտավոր է տալ հարցի լուծումն՝ շուտափույթ վերացնելով վթարային իրավիճակը:
Ըստ այդմ էլ՝ կարելի էր կարծել՝ Նուբարաշեն քրեակատորղական հիմնարկում կամ Քրեակատարողական վարչությունում պետք է «Երկիր Ծիրանի»-ն իրականացներ իր բողոքի ակցիան, սակայն արդյունավետ գործի փոխարեն, կարծես, ավագանու ընդդիմադիր անդամները նախընտրել են հանդիսատեսի բազմամարդությունը, քանի որ շատերն էին ավագանու նիստը դիտում ուղիղ միացումով , իսկ տասնյակ լրագրողներ էլ՝ հետևում էին հենց դահլիճում:
Ի դեպ, կարծում եմ, «Երկիր Ծիրանի»-ն լավատեղյակ էր, թե ով է խնդրի պատասխանատուն, քանի որ երեկ ներկա էր եղել Նուբարաշենի բանտի հարակից տարածքում՝ շենքերի բնակիչների ակցիային:
Նշենք, որ բողոքի ակցիայի ժամանակ կրքերը բավականին լարված են եղել և հանդարտվել են միայն այն ժամանակ, երբ ժամանել է Էրեբունի վարչական շրջանի ղեկավարի աշխատակազմի կոմունալ բաժնի պետն ու տեղեկացրել հետևյալը. «Կապվել ենք Կալանավայրերի վարչության պետի հետ: Իրենց ասելով, մոտակա ժամանակներում կսկվեն շինարարական աշխատանքները: Նախագիծը, նախահաշիվը պատրաստ է արդեն»:
Բնակիչները որոշել են սպասել, իսկ ահա Զարուհի Փոստանջյանը շտապեց, բայց՝ սխալ հասցեով...
Հեղինակ՝
Ա. Մաթևոսյան
