Կյանքի նպատակը երեխաներ ունենալն էր. մահացած ծննդկանը 17 տարի «Արբես»-ի ֆիզիոթերապեւտն էր

Երեւանի «Շենգավիթ» բժշկական կենտրոնում հուլիսի 21-ին կեսարյան հատումով զույգ ունեցած եւ մեկ օր անց մահացած Նաիրա Աբգարյանը ֆիզիոթերապեւտ էր, աշխատում էր «Արբես» առողջության կենտրոնում: Այս տեղեկությունը NEWS.am-ի հետ զրույցում հաստատեց կենտրոնի տնօրեն Մանուշակ Երիցյանը:

«17 տարի մեզ մոտ էր աշխատում, իր ամբողջ կյանքի նպատակն էր երեխաներ ունենալը, նպատակն իրագործեց, բայց... կյանքի գնով»,- ասաց նա:

44-ամյա Նաիրա Աբգարյանը, ըստ կենտրոնի տնօրենի, հղիացել էր արհեստական բեղմնավորման ճանապարհով, «Արագիլ» հիմնադրամի օգնությամբ, ծանր հղիություն էր ունեցել. «Կեսարյան հատումից հետո նրան տեսել եմ, համեմատաբար լավ էր, ուրախ էր: Թե հետո ինչ տեղի ունեցավ, ոչ մեկս չհասկացանք»:

Ծննդկանի երեխաների վիճակը կայուն է, նրանք գտնվում են «Շենգավիթ» ԲԿ-ում՝ համապատասխան մասնագետների հսկսղության տակ:

Նշենք, որ վիրահատությունը կատարել է «Շենգավիթ» ԲԿ-ի ծննդօգնության գծով գլխավոր տնօրենի տեղակալ, մանկաբարձական բաժնի վարիչ Աշոտ Սիրունյանը:

Հիշեցնենք, որ ըստ ԲԿ-ի պարզաբանման՝ ուշ հետծննդյան շրջանում սկսվել է ատոնիկ արյունահոսություն, նկատվել է մակարդելիության անկում, որը կոնսերվատիվ միջոցներով չի հաջողվել շտկել։ Առաջատար մասնագետների հետ խորհրդակցելուց հետո արյունահոսության դադարեցման եւ կնոջ կյանքը փրկելու նպատակով հեռացվել է արգանդը։ Հաջորդ առավոտյան ժամը իննի շրջանում կնոջ վիճակը սկսել է վատանալ, ի հայտ են եկել ներանոթային տարածուն մակարդման (թրոմբոհեմոռագիկ) համախտանիշի նշաններ։ Որոշվել է հիվանդին տեղափոխել «Սբ. Գրիգոր Լուսավորիչ» ԲԿ, որտեղ էլ մահացել է:

Կնոջ մոտ նախնական տվյալներով եղել է արյան մակարդելիության անկում եւ հետագայում բացակայում: Կնոջ մահվան պատճառները պարզելու համար փորձաքննություն է նշանակվել: