Էրիկ. «Փորձում էինք գաղտնի պահել, բայց չստացվեց»
ՎԻԴԵՈԷրիկ Կարապետյանի հետ մեր նոր զրույցի առիթն օրերս թողարկված «Իմ աշխարհ եկ» երգի տեսահոլովակն է: Նա ասաց, որ երկար ժամանակ փորձում էին երգը հեռացնել տարբեր հարթակներից, որպեսզի նորություն լիներ ու առաջին անգամ հնչեր տեսահոլովակում, ինչն այնքան էլ չի հաջողվել:
«Փորձում էինք երգը գաղտնի պահել, որպեսզի պրեմիերա լիներ, բայց մարդիկ հասցրել էին իրար ուղարկել, տարածել: Իհարկե, ի ուրախություն ինձ է, որ երգն արդեն հասցրել է սիրվել: Շատ դեպքեր են լինում, երբ գումար ես ծախսում, գեղեցիկ տեսահոլովակ ես նկարահանում, բայց երգն այդպես էլ մնում է իր տեղում: Սա փաստորեն այդ դեպքերից չէ: Շատ շնորհակալ եմ նրանց, ովքեր սիրել են մեր նոր աշխատանքը: Վստահ եմ՝ ովքեր դեռ չեն հասցրել լսել, նրանց նույնպես դուր կգա»,- ասաց նա:
«Իմ աշխարհ եկ» տեսահոլովակի նկարահանումներին
Նշենք, որ երգի երաժշտության հեղինակն ինքը՝ Էրիկն է, խոսքերը գրել է Գրիգոր Կյոկչյանը, գործիքավորումն արել է Մարտին Միրզոյանը: Տեսահոլովակի ռեժիսորն Արեն Բայադյանն է, օպերատորը՝ Արտյոմ Աբովյանը.«Մի թիմ, որի հետ ես բազմիցս աշխատել եմ, ու հիմա եւս մեկ աշխատանք ունեցանք միասին: Տեսահոլովակն իր ոճով ու գունային լուծումներով տարբերվում է իմ նախորդ աշխատանքներից: Սյուժե, որպես այդպիսին, չկա, կա հոգեվիճակ, որը համահունչ է երգին: Շեշտը դրել ենք երգի վրա, քանի որ այս դեպքում, կարծում եմ, հենց դա է ամենակարեւորը: Ոչ մի ուրիշ խանգարող բան չպետք է լիներ տեսահոլովակում»,- ընդգծեց երգիչը:
Նրա հետ զրուցեցինք նաեւ վերջերս Թբիլիսիում կայացած համերգի մասին, որտեղ բացի իրենից, հանդես էին եկել հայկական շոու-բիզնեսի այլ ներկայացուցիչներ, այդ թվում՝ Միհրան Ծառուկյանը, Արփի Գաբրիելյանը, Գոռ Հակոբյանը, Վաչե Ամարյանը, Մավր Մկրտչյանը, իսկ երեկոն վարել է Մենչը՝ Արմեն Պետրոսյանը: Յոթ տարի անց սա առաջին համերգն է եղել Վրաստանի մայրաքաղաքում, որտեղ միասին ելույթ են ունեցել հայ երգիչները: Էրիկի կարծիքով՝ թբիլիսահայ հանդիսատեսը բավական փոխվել է եւ ծանոթ է հայ կատարողներին ու նրանց երգերին: Դրան, իհարկե, նպաստել է նաեւ համացանցը:
«Իմ աշխարհ եկ» տեսահոլովակի նկարահանումներին
«Հետաքրքիր է, որ այնտեղ բոլորին շատ լավ գիտեին, ճանաչում էին: Դա ինձ համար մեծ ուրախություն էր որպես Թբիլիսիի հայ: Ուզում եմ ասել՝ սա սկիզբն էր թբիլիսյան համերգների: Վստահ եմ՝ մոտ ապագայում նման շատ համերգներ կլինեն, բայց ես խոստացել եմ այնտեղի հայ հանդիսատեսին, որ մենահամերգով անպայման հանդես կգամ: Բնականաբար, այս տարի արդեն չենք հասցնի, բայց հաջորդ տարի՝ երեւի աշնանը, մեծ համերգ կունենամ նվագախմբի հետ»,- հավելեց երգիչը:
Լուսանկարները տրամադրել է Էրիկը
