«Նոր տարին Երևանում 2018» տոնական միջոցառումների ծրագիրը հանրությանը կներկայացվի դեկտեմբերի սկզբին

Երևանի քաղաքապետարանում կայացած աշխատանքային խորհրդակցության ժամանակ աշխատակազմի արտաքին ձևավորման և գովազդի վարչության պետը քաղաքապետ Տարոն Մարգարյանին զեկուցել է, որ սահմանված ժամանակացույցով մայրաքաղաքի վարչական շրջաններում ընթանում են Ամանորի տոնական ձևավորման աշխատանքները:

Անդրադառնալով Ամանորի առթիվ նախատեսված միջոցառումներին՝ Տարոն Մարգարյանը քաղաքապետի տեղակալ Արամ Սուքիասյանին հանձնարարել է ձևավորել աշխատանքային խումբ և կազմել Ամանորի միջոցառումների ծրագիրը, որն այս տարի կանցկացվի «Նոր տարին Երևանում 2018» խորագրով: Պատասխանատուներին հանձնարարվեց միջոցառումների ծրագիրը կազմելիս ներառել ինչպես քաղաքապետարանի, վարչական շրջանների, այնպես էլ մասնավորի հետ համագործակցաբար իրականացվող բոլոր միջոցառումները:
«Մեր նպատակն է Երևանը հետաքրքիր դարձնել թե ՛ մեր քաղաքացիների և թե ՛ քաղաքի հյուրերի համար ոչ միայն ամառվա ընթացքում, այլև ձմռանը, հատկապես Ամանորի տոնական օրերին: Անցած տարվանից նոր մշակույթ ձևավորվեց մեր քաղաքում, երբ տոն օրերին համայնքային թանգարանները, ինչպես նաև բազմաթիվ ժամանցի վայրեր գործում էին: Հարկավոր է նաև, որպեսզի միջոցառումները կազմակերպվեն Ամանորի հանգստյան օրերին, որպեսզի մայրաքաղաքում լիարժեք տոնական, աշխույժ մթնոլորտ ապահովվի»:
Քաղաքապետ Տարոն Մարգարյանը հանձնարարեց վարչական շրջանների ղեկավարներին, ինչպես նաև աշխատակազմի առևտրի և սպասարկումների վարչությանն այդ հարցում ակտիվորեն համագործակցել տնտեսվարողների հետ, իսկ մշակույթի վարչությանը հանձնարարվեց սահմանել քաղաքապետարանի ենթակա թանգարանների համար Ամանորի տոնական օրերի աշխատանքային ժամանակացույց:
«Նոր տարին Երևանում 2018» տոնական ծրագրում կներառվեն նաև մայրաքաղաքի գլխավոր տոնածառի, ինչպես նաև քաղաքի տոնական լույսերի միացման, ավանդական դարձած Կարապի լճի սառցադաշտի բացման, Հյուսիսային պողոտայում անցկացվելիք Ամանորի տոնավաճառի, Ազատության հրապարակում և վարչական շրջաններում նախատեսվող տոնական միջոցառումները:
«Նոր տարին Երևանում 2018» ամանորի տոնական միջոցառումների ծրագրի մանրամասները հանրությանը կներկայացվեն դեկտեմբերի սկզբին: