Շաքարավազի գնի նվազումը պայմանավորված է մրցակցության ուժեղացմամբ, կա 50 ներկրող ընկերություն. Արտակ Շաբոյան
ՖՈՏՈ
Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը լրագրողների հետ զրույցում անդրադարձավ վերջին շրջանում նկատվող գների բարձրացմանը: Մասնավորապես կարագի գների բարձրացման վերաբերյալ նա ասաց, որ դա նկատվել է դեռևս անցած տարվա սեպտեմբերից և ուսումնասիրությունները ցույց են տալիս, որ միջազգային շուկայում կարագի վաճառքի գները մեծ չափով` շուրջ 86 տոկոսով բարձրացել են, իսկ մեր երկրում վաճառքի գները բարձրացել են շուրջ 70 տոկոսով:
Ինչ վերաբերում է մսին, ապա նա նշեց, որ կան բազմաթիվ միս արտադրողներ, անհատ գյուղացիներ, և այս տեսանկյունից մսի ոլորտը մրցակցային է, ինչի համար էլ հատուկ ուշադրություն չեն դարձնում: Չնայած դրան, նա հայտնեց, որ իրենց ունեցած տվյալներով հիմնականում թանկացումը պայմանավորված է արտաքին պահանջարկով:
Արտակ Շաբոյանը նշեց նաև, թեև հիմա խոսվում է գնային բարձրացումների մասին, սակայն մի շարք ապրանքային շուկաներում տեղի է ունենում նաև գնային նվազեցումներ:
«Այս տարվա ընթացքում շաքարավազի գները կտրուկ նվազել են` շուրջ 14 տոկոսով, և այս պահին վաճառքի գինը կազմում է 335 դրամ, այսինքն՝ կտրուկ իջեցում է տեղի ունեցել և շաքարավազի շուկայում այդ իջեցումը պայմանավորված է մրցակցության ուժեղացմամբ և խորացմամբ»,– ասաց նա։
Արտակ Շաբոյանը նշեց, որ վերջին տարիներին շատ էր խոսվում, որ շաքարավազի շուկան մենաշնորհացված է, բայց ՏՄՊՊՀ ուսումնասիրության արդյունքներով` այս պահին շուրջ 50 ընկերություն կա, որն իրականացնում են շաքարավազի ներկրում:
«Ճիշտ է, այդ 50-ից հիմնական մասը փոքր ընկերություններ են, անհատ ձեռներեցներ են և փոքր խմբաքանակներով են ներկրում իրականացնում, սակայն դա այլ հարց է, և կարևորն այն է, որ մուտքի խոչընդոտներ չկան»,-ասաց նա:
ՏՄՊՊՀ նախագահը վստահեցրեց, որ եթե որևէ մեկը, որևէ տնտեսվարող նպատակահարմար է գտնում տվյալ բիզնեսով զբաղվել, տվյալ գործունեությունն իրականացնել և շաքարավազ ներկրել, ապա առանց որևէ սահմանափակումների դա կարող է իրականացնել:
Բացի այդ Արտակ Շաբոյանը տեղեկացրեց, թե գնագոյացման հաշվարկները ցույց են տալիս, որ հնարավոր նվազագույն գներով է վաճառվում շաքարավազ: «Սակայն պետք է հաշվի առնել մեր երկրի առանձնահատկությունն այն առումով, որ տրանսպորտային մեծ ծախսեր են կատարում Հայաստան ապրանքներ ներկրելու համար: Երբ մենք գնագոյացման ոլորտում խնդիրներ ենք տեսնում, մենք համապատասխան պատասխանատվության միջոցներ կիրառում ենք, իսկ երբ մենք չենք տեսնում, ապա դրանց արդյունքները հրապարակում ենք»,-ասաց նա և նշեց, որ ներկայումս իրենց կարևորագույն խնդիրը մուտքի խոչընդոտների բացահայտումն է:
Խոսելով ԵԱՏՄ տարածքում մրցակցության մասին, Արտակ Շաբոյանն ասաց.«ԵԱՏՄ անդամակցությունից հետո ներմուծումները մի շարք ապրանքային շուկաներում շատացել են, քանի որ մաքսային ընթացակարգերը հեշտացել են և բավականին շատ տնտեսվարողներ են այսօր ներմուծումներ կատարում և մի շարք ապրանքային շուկաներում մրցակցությունը խորացել է: Ինչ վերաբերում է հայկական ընկերություններին, ապա որոշ արտահանող հայկական ընկերությունններ վերջին ժամանակահատվածում խոչընդոտների էին հանդիպում Եվրասիական տնտեսական տարածքում և մեր ուսումնասիրությունները ցույց տվեցին, որ դրանք ավելի շատ խոչընդոտներ են, որոնք կապված են մրցակցային մարմինների գործունեության հետ»:
