ԱՄՆ նախագահի նախկին կինը պատմել է, որ Թրամփը չգիտեր՝ ինչպես շփվել զավակների հետ (լուսանկարներ)
ՄԻՋԱԶԳԱՅԻՆ
Միացյալ Նահանգների նախագահ Դոնալդ Թրամփի նախկին կինը՝ չեխ մոդել, մարզուհի Իվանա Թրամփը, ուշագրավ գիրք է գրել մոլորակի ամենահարուստ մարդկանցից մեկի հետ ընտանեկան կյանքի ու միասին անցկացրած տարիների մասին:
Ինչպես նշում է The Daily Mail-ը, գրքում 68-ամյա հեղինակը խոստովանել է, որ Թրամփը գաղափար անգամ չի ունեցել, թե ինչպես է հարկավոր շփվել զավակների հետ:
Իվանայի պնդմամբ՝ ԱՄՆ-ի ապագա ղեկավարը չէր կարողանում «երեխաների հետ խոսել նրանց լեզվով»:
«Դա նրան չէր հաջողվում այնքան ժամանակ, մինչև որ երեխաները դարձան ուսանող»,-գրել է հեղինակը, որը Դոնալդ Թրամփից ունի 3 երեխա՝ 2 որդի և մեկ դուստր:
Ամուսնալուծությունից հետո Իվանան երեխաների համար ամբողջ պատասխանատվությունը վերցրել է իր վրա:
«Ես Դոնալդին ասացի, որ խոհանոցում կարող է միայն մի խոհարար լինել, և դա ես եմ»,-գրել է նախկին կինը:
Նա նաև պատմել է, որ իր և Դոնալդի երեխաները երբեք շփացած չեն եղել, այդ իսկ պատճառով ինքն ու նախկին ամուսինը շատ են հպարտանում նրանցով: Իվանան ընդգծել է, որ երբեք չափից շատ գումար զավակներին չի տվել ու հետևել է, որ նրանք մշտապես ինչ-որ հետաքրքիր գործով զբաղված լինեն:
