Ժիրայր Սեֆիլյանը պատրաստ է հանդիպում ունենալ նույնիսկ Սերժ Սարգսյանի հետ

a1plus.am — Հիմնադիր խորհրդարանի անդամ, կալանավորված Ժիրայր Սեֆիլյանը պատրաստ է հանդիպում ունենալ նույնիսկ Սերժ Սարգսյանի հետ՝ հարցին լուծում տալու նպատակով: Միաժամանակ նա կոչով է հանդես եկել: «Այդ կոչը միայն այդ տղաներին ուղղված չէ, կոչը ասում է, որ ամեն գնով պետք է խուսափել արյունահեղությունից եւ դա իրականացնելու համար ինքը Սեֆիլյանը պատրաստ է ամենաբաձր մակարդակով հանդիպում ունենալ»,- այս մասին «Ա1+»-ին հայտնեց Հիմնադիր խորհրդարանի անդամ Ալեք Ենիգոմշյանը, ով երեկ տեսակցել է Ժիրայր Սեֆիլյանին:

Երեկ նա հանդիպել է նաեւ Էրեբունու ՊՊԾ շենքը առավոտյան գրոհած «Սասնա ծռեր» ջոկատի մի խումբ անձանց հետ:

«Այնտեղ գտնվող տղաներն առաջին իսկ րոպեից պահանջել էին Ժիրայր Սեֆիլյանին բերեն այդ զորամաս, բայց ուժային կառույցները դա բացարձակապես մերժել էին: Եթե ուժային կառույցների կողմից հեշտացվի, պարոն Սեֆիլյանը պատրաստ է գնալ հանդիպման»,- ասաց Ալեք Ենիգոմշյանը:

Նրա խոսքերով՝ իրենք զրկված են ինտերնետից եւ սնունդից:

Ալեք Ենիգոմշյանը միաժամանակ տեղեկացրեց, որ ոստիկանության գնդապետ Արթուր Վանոյանի զոհվելը շատ է բարդացրել իրավիճակը: «Չնայած ներսում գտնվող տղաների մոտ էլ վիրավորներ կան: Մի ծանր հիվանդ կա՝ Թաթուլ անունով, մյուսն ավելի միջին ծանրության վիրավոր է, անունը չեմ հիշում»,- նշեց Ալեք Ենիգոմշյանը:

Իսկ ինչ վերաբերում է ոստիկանության պետի տեղակալ Հունան Պողոսյանի այն հայտարարությանը, թե միայն ոստիկաններն են տուժել, Ենիգոմշյանը նշեց. «Դա ամբողջությամբ անճիշտ հայտարարություն է»:

Ի դեպ, ուշ գիշերին մեկ պատանդ է ազատ արձակվել, սակայն դա Ժիրայր Սեֆիլյանի կոչը չի եղել,այլ բարի կամքի դրսեւորում: