Խոշոր վթար Դավիթաշենում. բախվել են շտապօգնության «Ֆորդն» ու «Հոնդան». վերջինիս վարորդը սթափ չի եղել. կա 5 վիրավոր (ֆոտո)

Երեւանում, այսօր՝ սեպտեմբերի 30-ին, ավտովթար է տեղի ունեցել. ժամը 02։00-ի սահմաններում Դավիթաշեն վարչական շրջանի 2-րդ եւ 5-րդ փողոցների խաչմերուկում բախվել են 54-ամյա Արշակ Ա.-ի վարած Ford մակնիշի 023 ՍԼ 64 համարանիշի եւ 40-ամյա Արթուր Չ.-ի վարած Honda մակնիշի 51 CA 001 համարանիշի ավտոմեքենաները։

Shamshyan.com-ի փոխանցմամբ, վթարի հետեւանքով Ford-ի ուղեւորներ 49-ամյա Ալինա Հ.-ն, 28-ամյա Վալտեր Հ.-ն եւ Honda-ի ուղեւորներ 35-ամյա Գագիկ Հ.-ն, 32-ամյա Ելենա Հ.-ն մարմնական վնասվածքներով տեղափոխվել են «Աստղիկ» բժշկական կենտրոն, իսկ 8-ամյա Ալեն Հ.-ն՝ «Սուրբ Աստվածամայր» բժշկական կենտրոն։

Աղբյուրի տեղեկություններով՝ Արշակ Ա.-ն աշխատում է «Երեւանի 1-03 շտապօգնություն» ՓԲԸ-ում՝ որպես վարորդ։ Նա լուսային ազդանշանները միացված վիճակում կանչի վայր մեկնելիս է եղել։ 2 վարորդները ենթարկվել են փորձաքննության. պարզվել է, որ շտապօգնության վարորդ Արշակ Ա.-ն եղել է սթափ, իսկ Honda-ի վարորդ Արթուր Չ.-ն՝ ոչ սթափ վիճակում։

Հետաքննիչի հանձնարարականով ավտոմեքենաները տեղափոխվել են Երեւանի ՃՈ պահպանվող հատուկ տարածք։