Facebook–ն օգնել է գտնել Նիսում խուճապի պահին կորած երեխային

Նիսի առափնյա հատվածում ահաբեկչության հետեւանքով ստեղծված խուճապի ժամանակ կորած 8-ամսական երեխային նրա ընտանիքը գտել է Facebook–ի շնորհիվ։ Ընտանիքը Facebook–ում գրառում էր կատարել երեխայի անհետանալու մասին եւ տեղադրել #PortesOuvertesNice հեշթեգը։

Ընտանիքը մանկասայլակի մեջ գտնվող երեխային կորցրել էր, երբ բազմությունը խուճապահար փախել էր մարդկանց մեջ մխրճված բեռնատարից։

«Մենք կորցրել ենք 8-ամսականբ երեխային։ Խնդրում եմ, եթե դուք նրան տեսել եք, կամ վերցրել եք, մեզ տեղյակ պահեք»,– գրել են նրանք։ Երեխային գտել էր ոմն մադամ Ժոյ Ռուեզը եւ սոցցանցով տեղյակ պահել։

Հիշեցնենք, որ հուլիսի 14-ի երեկոյան՝ տեղական ժամանակով ժամը 22։30-ի սահմաններում, Նիսի Անգլիական ափին հավաքված մարդկանց խմբի մեջ մեծ արագությամբ բեռնատար էր մխրճվել։ Վարորդը մարդկանց մեջ էր մխրճվել Բաստիլի գրավման օրվա տոնական հրավառության ժամանակ։ Բեռնատարը, մոտ 2 կմ զիգզագաձեւ շարժվելով, փորձել է հնարավորինս շատ մարդկանց ճզմել։ Հետո վարորդը կրակ էր բացել մարդկանց վրա։

Ոստիկանության գործողությունների արդյունքում նա սպանվել է։ Բեռնատարի մեջ հայտնաբերվել է մեծ քանակությամբ զենք եւ պայթուցիկ։
Ըստ վերջին տեղեկությունների՝ զոհվել է 84 մարդ, ավելի քան 18-ի վիճակը ծայրահեղ ծանր է։ Վարորդը Ֆրանսիայի եւ Թունիսի քաղաքացի է։ Նա 31 տարեկան է։ Նախկինում ոստիկանության ուշադրության կենտրոնում էր հայտնվել գողության եւ խուլիգանության համար։

Ըստ ՀՀ ԱԳՆ մամուլի խոսնակ Տիգրան Բալայանի՝ զոհերի մեջ ՀՀ քաղաքացի կա: Իր հերթին Հայ եկեղեցու Նիսի հոգեւոր հովիվ Հայր Գրիգոր աբեղա Խաչատրյանը

NEWS.am-ին հայտնել է, որ զոհված կինը 40 տարեկան է, նաեւ վիրավորների մեջ կա երեք հայ: