Կառավարության և Համաշխարհային բանկի հիմնական նպատակները համահունչ են. Կարեն Կարապետյան
ՔԱՂԱՔԱԿԱՆՈՒԹՅՈՒՆ
Համաշխարհային բանկը Հայաստանի հանրապետության համար առանցքային գործընկեր է. այս մասին այսօր Հայաստանի հանրապետության և Համաշխարհային բանկի 25 տարվա համագործակցությանը նվիրված ֆորումի ժամանակ ասաց ՀՀ վարչապետ Կարեն Կարապետյանը:
«Մենք հաջողությամբ համագործակցում ենք տնտեսության կառավարման բոլոր ոլորտներում: Այս 25 տարիների ընթացքում Համաշխարհային բանկի աջակցությամբ իրականացվել են Հայաստանի սոցիալ-տնտեսական զարգացման և ժամանակակից ինստիտուտներին ուղղված բազմաթիվ ծրագրեր: ՀԲ խմբի տարբեր կառույցների կողմից տրամադրված գործիքներն օգնել են ապահովել տնտեսական աճ, զարգացում և առաջընթաց: 2014 թվականից մենք թևակոխեցինք զարգացման նոր շրջան՝ միջազգային զարգացման գործակալության ծրագրերից անցում կատարելով վերակառուցման զարգացման միջազգային ծրագրերին»,-ասաց վարչապետը:
Նրա խոսքով՝ ներկայումս ՀՀ կառավարությունը նախաձեռնել է և իրականացնում է ՀՀ տնտեսության արմատական բարեփոխումների և արդիականացմանն ուղղված համակարգային ծրագիր: Կարեն Կարապետյանն ասաց, որ Կառավարության ծրագիրը նման գնահատականի արժանացել է նաև Համաշխարհային բանկի գործընկերների կողմից, ում գնահատականը ՀՀ կառավարության համար չափազանց կարևոր է:
«Այս ծրագիրը պահանջում է առկա ռեսուրսների մոբիլիզացում, դրանց օգտագործման արդյունավետության բարձրացում, և էլ ավելի սերտ համագործակցություն մեր հիմնական գործընկերների հետ: Ուրախ եմ փաստելու, որ Կառավարության և համաշխարհային բանկի հիմնական նպատակները համահունչ են: Ապագային ուղղված մեր վերջնանպատակն է ունենալ անկախ, անվտանգ, արդար և խելացի Հայաստան: Ապագայի այսպիսի Հայաստանի կերտումը պետք հանդիսանա ՀՀ և բանկի համագործակցության առանցքային հենասյունը»,-ասաց Կարապետյանը:
Վարչապետը նշեց, որ ապագան կառուցելու, ՀՀ-ի անվտանգությունն ապահովելու համար անհրաժեշտ է ունենալ զարգացած, մրցունակ տնտեսություն, իսկ ապագայի Հայաստանի հիմքը պետք է դրվի դպրոցից և շարունակվի անընդհատ:
