Իրանցիներին դուրս են հանել խանութից. տուրիզմ են «զարգացնում»

Հայաստանի Հանրապետությունում տուրիզմը «զարգացնելու» նոր մեթոդ են սկսել կիրառել: Այժմ որոշ խանութների «տերեր» զբոսաշրջիկ «կպցնելու» փոխարեն, նրանց պարզապես դուրս են հանում:

Նման դեպքի երկու օր առաջ ականատես է եղել Ֆեյսբուքյան օգտատեր Յաշա Սոլոմոնյանը: Նա տեսել է, թե ինչպես են Կասկադի մոտ գտնվող խաղալիքների մի խանութից հրմշտելով հեռացնում իրանցի զբոսաշրջիկներին: Ականատեսը ֆեյսբուքյան իր էջում գրել է, որ զբոսաշրջիկները ցանկանում էին մտնել խանութ՝ նվերներ գնելու, սակայն աշխատակիցները նրանց թույլ չեն տվել ներս մտնել: «Մի ցավալի, անհանգստացնող ու նյարդայնացնող դեպքի եմ ականատես եղել: Կասկադի մոտ գտնվող խաղալիքների մի խանութից հրմշտելով հեռացնում էին իրանցի զբոսաշրջիկների: Զբոսաշրջիկները միջին տարիքի տղամարդիկ էին՝ իրենց կանանց ու երեխայի հետ: Մարդիկ ցանկանում էին մտնել խանութ՝ նվերներ գնելու, սակայն աշխատակիցները նրանց թույլ չտվեցին ներս մտնել: Գոռգոռալով, հրմշտելով՝ հեռացնում էին խանութի մոտից: Իրանցիների արտաքին տեսքից, ինչպես նաեւ սահուն անգլերենից հասկացվում էր, որ կիրթ, գրագետ ու «աշխարհ տեսած» մարդիկ էին: Խեղճերը ապշած այս ու այն կողմ էին նայում, հարցնում, թե ինչի չի կարելի ներս մտնել՝ ի պատասխան լսելով խանութի անվտանգության աշխատակցի անհոդաբաշխ «no enter»-ը:

Երբ աշխատակցին հարցրեցի, թե ինչի ներս չի թողնում, նա ասաց, որ տնօրինության կարգադրությունն է «գող պարսիկներին» ներս չթողնել: Այն հարցին, թե որտեղի՞ց են հասկացել, որ պարսիկները, եւ հատկապես այս մարդիկ գող են, նա պատասխանեց, որ սաղ պարսիկներն էլ գող են ու իրենց խանութ պիտի չմտնեն»: Միջադեպին ականատես Յաշա Սոլոմոնյանը փորձել է զրուցել իրանցիների հետ: Վերջիններս պատմել են, որ առաջին անգամ են Հայաստանում եւ սա առաջին միջադեպը չէ, որ տեղի է ունեցել իրենց հետ. «Զրուցակիցս բժիշկ էր ու երկար տարիներ սովորել էր արտերկրում: Փորձեցի վիճակը մեղմել՝ ասելով, որ սա Երեւանի ամենավատ խանութն է, շատ վատ սպասարկում ունեն, եւ տեղացիներն էլ են խուսափում այստեղից առեւտուր անել: Իսկ այլայլված եւ վիրավորված տղամարդն ասաց, որ արդեն երկրորդ օրն է Երեւանում են, ապրում են կենտրոնի հյուրանոցներից մեկում, եւ սա արդեն երրորդ դեպքն է իրենց հետ: Մի խանութում էլ անգամ կնոջ պայուսակն են դուրս գալուց ստուգել: Իհարկե, ոչինչ չեն գտել, ու անգամ ներողություն էլ չեն խնդրել...»,-գրառել է օգտատերը:

Մեզ հայտնի դարձավ, որ խանութը, որտեղ իրանցի զբոսաշրջիկների նկատմամբ ոչ հարգալից վերաբերմունք են ցուցաբերել «Ռեյմա» հայտնի բրենդային խանութն է եղել: Երեկ ողջ օրը չհաջողվեց խանութի տնօրինությունից պարզաբանում ստանալ կատարվածի վերաբերյալ: Խանութի աշխատակիցները միայն նշում էին, որ ոչ տնօրենը եւ ոչ էլ խանութի մենեջերը տեղում չեն:

Սույն միջադեպի շուրջ զրուցեցինք ՀՀ էկոնոմիկայի նախարարության զբոսաշրջության զարգացման քաղաքականության վարչության պետ Մեխակ Ապրեսյանի հետ: Վերջինս նախ հորդորեց համաքաղաքացիներին այս կամ այն միջադեպը չդարձնել հանրային քննարկման առարկա եւ չներկայացնել որպես հանրային կարծիք. «Մանավանդ ճշտված լուրերի դեպքում: Որեւէ անձի կատարած արաք կամ իրավախախտում չվերագրել ազգին: Մեկ-երկու դեպքեր ամեն երկրում, ամեն մարդու հետ էլ կարող է պատահել: Մի բան չմոռանանք, որ Իրանից Հայաստան այցելությունները գնալով ավելանում են: Իրանում ՀՀ-ի նկատմամբ հետաքրքրությունը գնալով մեծանում է, Հայաստանը որպես զբոսաշրջային երկիր՝ ավելի ճանաչելի ու գրավիչ է դառնում իրանական շուկայում: Դա է փաստում նաեւ այցելությունների թվի աճը: Եթե Հայաստանից իրանցիները դժգոհ վերադառնան, բնականաբար մենք նման աճ չենք ունենա: Իրանցիները Հայաստանում իրենց ընդունված են զգում: Հայերը հայտնի են աշխարհում իրենց լեգենդար հյուրընկալությամբ եւ հյուրասիրությամբ եւ մենք չպետք թույլ տանք չմտածված արտահայտություններով, մեկ-երկու մասնավոր դեպքեր հանրայնացնելով բացասաբար անդրադառնանք ինքներս մեր նկարագրի վրա եւ ստվեր գցենք բարեկամ ժողովուրդների հարաբերությունների վրա: Իհարկե, դա կախված է մեր ծառայությունների որակից, մենք պետք է ամեն ինչ անենք, որ ցանկացած զբոսաշրջիկ իրեն լավ զգա Հայաստանում»,-այսպես ներկայացրեց Ապրեսյանը:

Մեր դիտարկմանը, որ հրապարկվածը ոչ թե չճշտված տեղեկություններ են այլ ականատեսի պատմածը, Ապրեսյանը ասաց, թե իր աշխատակիցները փորձել են կապ հաստատել խանութների հետ. «Խանութից հերքվել է, որ նման միջադեպ է եղել: Դեռ ճշտված չեն 100 տոկոսանոց չեն առավելեւս չպետք հանրայնացնել: Կա նաեւ մեկանաբանությունր, չմտածված արտահայտություններ՝ ուղղված զբոսաշրջիկների դեմ: Սա սազական չէ հայ ազգին»: Մեր հարցին, թե նման մեկնաբանությունները, կարո՞ղ են ազդել զբոսաշրջության վրա, նա ասաց, որ չի կարծում, եթե դա չհանրայնացվի. «Եթե մենք մեկ-երկու լոկալ կարգի հարցեր հանրայնացնենք՝ մանավանդ այդպիսի չստուգված տվյալներ, իհարկե, կարող է ազդել»: Մյուս հարցին, թե սույն միջադեպը ռասիզմի դասական դրսեւորո՞ւմ չէ, զբոսաշրջության վարչության պետն ասաց. « Ոչ, ես նորից եմ ասում, չի կարող Հայաստանում լինել ռասիզմի դրսեւորում, մեկ-երկու միջադեպերին այսպիսի գնահատական մի տվեք: Դա կարող է լինել մեկի ոչ պրոֆեսիոնալ, չմտածված արարք, եթե թույլ չտա ծառայություններից օգտվել, դա իհարկե, բացասաբար կանդրադառնա հենց իրենց բիզնեսին»: Մեխակ Ապրեսյանը մեր զրույցում տեղեկացրեց, որ 2015 թվականին 2014-ի հետ համեմատ շուրջ 20 տոկոսով աճել է իրանցի զբոսաշրջիկների թիվը:

Աղբյուրը - Հայկական ժամանակ