Թող ասեն` փղի միս է. ո՞ւմ է ձեռնտու փոխել փորձաքննության արդյունքները

ԱՄԵՆԱԸՆԹԵՐՑՎԱԾ 14 Հուլիս, 2016 13:05

Հայտնել էինք, որ Կոտայքի մարզի Սեւաբերդ եւ Հատիս համայնքներում ձիեր էին գողացել, մորթել եւ տավարի մսի տեղ վաճառել: Անհանգստացած գյուղացիները վախենում էին մյուս անասուններին ազատ արձակել: Մեզ ահազանգած գյուղացիները պնդում էին, թե ձիու միսը վաճառել էին տավարի մսի փոխարեն 2200 դրամով, իսկ գյուղացիներն էլ այդ միսը գնել էին Գումի շուկայի դիմացի Խորենացի փողոցի 54 ա հասցեում գտնվող անհատ ձեռներեց Ալիխան Հասանյանին պատկանող մսի վաճառակետից:

Դեպքի առթիվ կատարվում էր քննություն: Պարզելու համար, թե գործն ինչ ընթացք է ստանում, կստանան վնասի փոխհատուցում, նախ զրուցեցինք Սեւաբերդ համայնքի բնակիչ Կամոյի հետ, ումից երկու ձի էին գողացել:

Կամոն մեզ ասաց, որ իրենք տեղեկություն ստանում են համայնքի ղեկավարից, տեղյակ են, որ գողին հայտնաբերել են. «էս քանի օր է` գնում եմ, քննիչը տեղում չի լինում, որ մի բան իմանանք, ասեցին, որ գողին բռնել են, 8 ժամ հետո բաց են թողել, ուզում էինք իմանալ ստորագրության դիմաց են բաց թողել, թե գումարի դիմաց: Էդ տղային ես ճանաչում եմ, մեր տուն էլ հաց է կերել: Ստեղ միայն գողին բռնելու խնդիրը չի: Մեր գնած միսը տարան փորձաքննության, բայց մենք 100% համոզված ենք, որ դա ձիու միս է, փորձաքննություն են արել, ասել են` չի համապատասխանում նույն կենդանու տեսակին, բայց մենք համոզված ենք, որ դա ձիու միս է: Չգիտեմ ում է ձեռնտու, որ գործը չբացվի:

Էդ մսից մի քանի սառնարանում պահած ունենք, Աբովյանում սննդի անվտանգության տեսչություն կա, աշխատակիցները ուզում էին միսը, որը մենք գնել էինք, շուկայից լրիվ մեր ձեռքից տանեին, որ մենք ընդհանրապես ապացույցներ չունենայինք: Մենք չտվեցինք: Ես ասում եմ, ոստիկանությանը մեր գնած մսից տվել եմ, գնացեք իրենցից վերցրեք, ասում էի, դա քիչ է: Ես փղի միս չեմ տեսել, եթե ասեն` փղի միս ա, կհավատամ, ես լավ գիտեմ ձիու միսը, կարողանում եմ տարբերել տավարի մսից: 25 օր հետո մի պայծառ առավոտ եկան ասեցին ձեր տված միսը Հասանյանի տված մսի հետ չի համապատասխանում, մենք արդեն էն գլխից գիտեինք, որ էդպես պետք է լինի: Ոստիկանությունը ասում է` շոուներ եք անում, մենք հետքի վրա ենք:

Սրանից 10 տարի առաջ ինձանից 2 հատ ձի նորից տարան, նորից հետքի վրա էինք, բայց չբացահայտեցին: Մենք հիմա ոչ միայն գողերի դեմ ենք պայքարում, մենք պայքարում ենք սննդի անվտանգության տեսչության դեմ, երբ մենք բացահայտեցինք, որ տվյալ հասցեում ձիու միս են վաճառում, իրենք էլ մտածում են` ստեղ վարչություն ա, պետական աշխատավարձ են ստանում, ինչ-որ մի գյուղացի եկել ա ստեղ, ձիու միս հայտնաբերել: Ասում են` ստեղ ձիու միս չկա»: Գյուղացիները չեն հավատում սննդի անվտանգության պետական ծառայության փորձաքննության արդյունքին` ասելով, շատ հնարավոր է, որ տավարի միս տված լինեն, քանի որ փորձաքննության արդյունքում տվյալ վաճառակետում ձիու միս չի հայտնաբերվել:

Դիմեցինք սննդի անվտանգության պետական ծառայություն` պարզելու, ինչպիսին են եղել փորձաքննության արդյունքները, եւ արդյո՞ք սննդի անվտանգության աշխատակիցներն են գնացել տվյալ մսի վաճառակետից միս վերցրել, թե նրանց այդ միսը տվել են իրավապահ մարմինները:

Ստացանք հետեւյալ պատախանը. ««Հրապարակ» օրաթերթում մայիսի 25-ին հրապարակված տեղեկության հիման վրա ՀՀ ԳՆ սննդամթերքի անվտանգության պետական ծառայությունը Երևան քաղաքի Խորենացի փողոցում (հայտնի որպես Գումի շուկա) մսի իրացմամբ զբաղվող տնտեսվարող սուբյեկտներում իրականացրել է դիտարկումներ:

Դիտարկման ընթացքում ձիու մսի վաճառքի դեպք չի հայտնաբերվել: Ձիերի գողության փաստով և դրանցից ստացված մսի հնարավոր իրացման խնդրով զբաղվում են իրավապահ մարմինները, որոնք էլ իրավասու են հրապարակել հավելյալ տեղեկատվություն: Այս տարածքում մսի վաճառքը մշտապես է ծառայության ուշադրության կենտրոնում, անասնահամաճարակային դիտարկումներն այստեղ պարբերական բնույթ են կրում»:

Դեպքի կապակցությամբ փորձեցինք պարզաբանում ստանալ ոստիկանությունից: Այնտեղից մեզ հայտնեցին, որ գործը ուղարկվել է քննչական կոմիտե: Քննչական կոմիտեի նախագահի խորհրդական Սոնա Տռուզյանը մեզ փոխանցեց.

«Դեպքի առթիվ հարուցվել է քրեական գործ Կոտայքի մարզային քննչական վարույթում: Քրեական գործերով ձեռնարկված միջոցառումների արդյուքում պարզվել է առերեւույթ հանցագործություն կատարած անձի ինքնություն` 1993թ.-ի ծնված Երեւան քաղաքի բնակիչ է:

Ապացույցներ են ձեռք բերվել, որ այդ երկու հափշտակությունները՝ Սեւաբերդ եւ Հատիս համայնքերում, կատարվել են նրա կողմից: Որոշում է կայացվել երկու քրեական գործերը միացնել նույն վարույթում եւ տվյալ անձին, հուլիսի 12-ին մեղադրանք է առաջադրվել քրեական օրենսգրքի 177-րդ հոդվածի 2-րդ մասի, 2 կետով: Հարցաքննվել է, ցուցմուքներ է տվել, որ այլ վայրերից է կատարել անասունների գողություն եւ նրա ցուցմունքներում մատնանշված հանգամաքները ստուգելու ուղղությամբ ձեռնարկվում են անհրաժեշտ քննչական գործողություններ»: