«Մարինեն իմ մուրազն էր՝ նույնիսկ ամուսնացած ժամանակ…» անչափահասը մանրամասներ է պատմել արյունալի դեպքի մասին

Աջափնյակ և Դավթաշեն վարչական շրջանների ընդհանուր իրավասության դատարանում Տաթևիկ Գրիգորյանի նախագահությամբ շարունակվեց Հակոբ Բ.-ի գործի դատական քննությունը:

41-ամյա Հակոբը մեղադրվում է տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Հակոբ Բ.-ն նախկինում մի քանի անգամ դատվել է, դատվածությունները մարված են:

Դեպքը կատարվել է 2015 թվականի հոկտեմբերի 29-ին, ժամը 21-ի սահմաններում:

Հակոբին այցելել է ընկերը՝ Արտակը՝ Արմավիրի մարզի բնակիչ: Նա խնդրել է, որ գիշերի Հակոբի տանը, ուշ ժամին իրենց գյուղ չմեկնի:

Հակոբը թույլ է տվել: Տղամարդիկ սեղան են նստել, ընթրել, խմել են օղի ու գարեջուր:

Երեկոյան ընթրիքին ներկա է եղել նաև հոր՝ Հակոբի բնակարանում գտնվող անչափահաս՝ 13 տարեկան որդին:

Սեղանի շուրջ Հակոբն ու Արտակը զրուցել են: Հյուրը անկեղծացել ու հարցրել է, թե որտե՞ղ է Հակոբի նախկին կինը՝ Մարինեն (անունը փոխված է): «Մարինես ո՞ւր ա, գիտե՞ս՝ Մարինեն իմ մուրազն էր՝ նույնիսկ ամուսնացած ժամանակ…»:

Հակոբը անթույլատրելի է համարել որդու ներկայությամբ նախկին կնոջ հասցեին խմած տղամարդու նմանօրինակ խոսակցությունը: Նա սեղանից վերցրել է խոհանոցային դանակն ու տեղնուտեղը հարվածել է Մարինեի մասին ջերմ խոսքեր ասող Արտակին:

Այնպես է հարվածել, որ դանակի շեղբը կոթից պոկվել է:

Հարվածից հանկարծակիի եկած Արտակը տեղից պոկվել ու դուրս է փախել: Բայց Հակոբը դանակի մեկ հարվածով չի բավարարվել: Նա խոհանոցից մեկ ուրիշ դանակ է վերցրել ու հետապնդել է փախչող Արտակին:

Դանակահարության այս տեսարանին ներկա դեռահաս տղան, ցավոք, ականատես է եղել նաև գործողությունների հետագա՝ ավելի արյունալի զարգացմանը:

Հակոբը, դանակը ձեռքին, Արտակի հետևից վազել ու նրան հասել է բակում: Նա դանակի բազմաթիվ հարվածներ է հասցրել Արտակին՝ այտային շրջանին, երկու ազդրերին, կրծքավանդակին, որովայնին: Պատճառել է բազմաթիվ վնասվածքներ, այդ թվում՝ որովայնի խոռոչ թափանցող, երիկամի և աղիների վնասումով վերքեր է պատճառել՝ Արտակի առողջությանը հասցրել է ծանր վնաս:

Հակոբը «սթափվել է» տուժողի ընկնելուց ու նրա մարմնից հոսող առատ արյունը տեսնելով: Նա դադարեցրել է հարվածներ հասցնելը, շոկային վիճակում գտնվող որդուն ուղարկել է շտապօգնություն զանգելու, ինքը ցանկացել է օգնել տուժողին, լվացել է վերքերն ու արյան հետքերը…

Հակոբի նախկին կին Մարինեն, որ գտնվում էր հարևանությամբ, բակից աղմուկ է լսել, աղմուկի մեջ տարբերել է Հակոբի ձայնը, ենթադրել է, թե նա հերթական անգամ վիճում է իր մոր հետ, ու անմիջապես ահազանգել է ոստիկանություն:

Դուրս գալով բակ՝ Մարինեն հանդիպել է որդուն, ով էլ մորը պատմել է քիչ առաջ ծավալված դրամատիկ ու արյունալի պատմությունը:

Շտապօգնությունն ու ոստիկանները դեպքի վայր են հասել: Տուժող Արտակի կյանքը հաջողվել է փրկել բժշկական միջամտության շնորհիվ, նա առողջական խնդիրներ ունի նաև ներկայումս:

Տուժողը դիմում էր ուղարկել դատարան՝ հայտնելով, թե առողջական խնդիրների պատճառով չի կարողանա մասնակցել դատական նիստերին, ինքը չի առարկում, եթե դատական քննությունն անցկացվի արագացված կարգով, Հակոբից բողոք կամ նյութական պահանջ չունի:

Չնայած դատարանը որոշել էր սկզբում հարցաքննել տուժողին ու նրան ևս մեկ անգամ ծանուցելու համար հետաձգել էր նախորդ դատական նիստը, բայց տուժողն այս նիստին էլ չէր ներկայացել: Դատարանը կայացրեց տուժողին բերման ենթարկելու որոշում:

Հարցաքննվեց Հակոբի նախկին կին Մարինեն:

Նա հայտնեց, որ Հակոբի հետ ամուսնացել է 2002 թվականին: Հենց սկզբից ապրել են անհաշտ: Համատեղ ամուսնական կյանքի ընթացքում ունեցել են մեկ դուստր ու մեկ որդի:
2015 թվականին Հակոբն ու կինը ամուսնալուծվել են:

Հակոբն ապրել է Աջափնյակում՝ նախկին զոքանչին պատկանող բնակարանում, որտեղ նրան գրանցել էին:

Մարինեն դառնությամբ ասաց, թե Հակոբն իրեն դուրս է արել իր մայրական տանից: Ինքը, ի վիճակի չլինելով բնակարան վարձակալել, երեխաների ու մոր հետ ապրել է հարազատների տներում:

Դեպքից մոտ տասն օր առաջ Մարինեն, նրա դուստրն ու մայրը բնակություն են հաստատել այն շենքի խորդանոցում, որտեղ գտնվում էր Մարինեի մայրիկի բնակարանը, և որտեղ ապրում էր Հակոբը: Վերջինիս հետ ապրել է նաև դպրոցական որդին, քանի որ մայրն ու քույրը ապրել են բարեկամների տներում:

Մարինեն նշեց, որ Հակոբը լավ հայր ու լավ ամուսին չի եղել: Նա հաճախակի վիճել է իր ու իր մայրիկի հետ:

Փաստորեն, նախկին կնոջ վերաբերյալ իր ընկերոջ ասած ջերմ խոսքերից Հակոբի պատվախնդրությունը գլուխ է բարձրացրել՝ հանցավոր արարք կատարելու աստիճան, իսկ որ նույն այդ կնոջը, խոսքային արատ ունեցող իրենց դստերն ու հենց բնակարանատեր նախկին զոքանչին դուրս է արել տնից, դարձրել անօթևան՝ դա արդեն Հակոբին առանձնապես ու նկատելի չի հուզել…

Մարինեն հայտնեց, որ դեպքի օրն ինքը խորդանոց-բնակարանում լվացք էր անում: Բակից աղմուկ է լսել, տարբերել է Հակոբի ձայնը ու անմիջապես մտածել է, թե Հակոբը վիճում է իր մոր հետ: Որպեսզի այդ վեճն անցանկալի զարգացում չունենա՝ Մարինեն, առանց տնից դուրս գալու, ահազանգել է ոստիկանություն, թե նախկին ամուսինն անհանգստացնում է իրենց: Ահազանգելուց հետո Մարինեն սենյակ է մտել ու զարմացել՝ սենյակում հանգիստ նստած մորը տեսնելով: Մայրը տեղյակ էլ չէր, թե ինչ է կատարվում բակում:

Մարինեն արդեն անհանգստացել է Հակոբի մոտ ապրող որդու համար, դուրս է եկել բակ, տեսել է որդուն ու իմացել է տեղի ունեցածը:

Մարինեն դատավարության կողմերի հարցերին պատասխանելով՝ ասաց, թե ինքն Արտակին ճանաչել է որպես Հակոբի ընկերոջ, իրենց միջև երբեք մտերմություն կամ ինտիմ կապ չի եղել:

Իսկ որ Արտակն իր հասցեին դրական բաներ է խոսել, Հակոբին նախատել է իրենից ամուսնալուծվելու համար, Մարինեն շատ բնական համարեց ու ասաց. «Դա էդպես էլ պիտի լիներ: Ես շրջապատում մեծ սեր ու հարգանք եմ վայելում, իմ մասին ոչ ոք բացասական բան ասել չի կարող…»:

Նախաքննական ցուցմունքում Մարինեն հայտնել էր, թե ցանկանում է դիմել պատկան մարմիններին՝ Հակոբին հայրական իրավունքից զրկելու համար…

Դատարանը մանկավարժի ներկայությամբ հարցաքննեց ամբաստանյալի անչափահաս որդուն, ում ներկայությամբ հայրը դանակով բազում վնասվածքներ էր հասցրել տուժողին:

Տղան որոշ նախադասություններ կրկնում էր անընդհատ՝ որ իրենց տուն եկած Արտակը «գինովցած էր», որ սեղանի շուրջ խմում էր միայն Արտակը, իսկ հայրը այդ երեկո բոլորովին չի խմել:

Երեխան ասաց, թե տեսել է՝ ինչպես է հայրը խփել Արտակին: Կատարվածի պատկերը այս երեխայի հիշողությունից հեշտությամբ չի ջնջվի, նրա հետ հոգեբանական աշխատանք կատարելու անհրաժեշտությունն ակնհայտ է, բայց, ամենայն հավանականությամբ, երեխան ինքնուրույն է հաղթահարելու ապրած շոկային վիճակը…

Մանրամասն՝ 1in.am