Թուրքիայի իշխանությունները կանգնել են փաստի առաջ՝ երկրի բանտերում այլևս տեղ չկա. «Ջումհուրիյեթ»
ՄԻՋԱԶԳԱՅԻՆ
Թուրքիայում գոյություն ունեցող 381 բանտից 139-ը կառուցվել է նախագահ Ռեջեփ Թայիփ Էրդողանի հիմնած «Արդարություն և զարգացում» կուսակցության իշխանության օրոք, այս մասին գրում է թուրքական «Ջումհուրիյեթ» պարբերականը՝ հղում անելով Ներքին գործերի նախարարության հաղորդած տվյալներին:
Ընդ որում՝ 38 բանտ իշխանությունները կառուցել են միայն անցած՝ 2016թ.-ի ընթացքում:
Վերջին մեկուկես ամսում երկրում ավելացել է ևս 11 բանտ, և դրանք բյուջեին արժեցել են շուրջ 1.5 մլրդ լիրա:
Պարբերականն ուշադրություն է հրավիրում այն փաստի վրա, որ հեղաշրջման փորձին հաջորդած զանգվածային ձերբակալություններից հետո իշխանությունը կանգնել է փաստի առաջ, քանի որ երկրի բանտերում այլևս նոր տեղեր չկան ևս մի քանի հազար կալանավորների համար: Հայտնի են դեպքեր, երբ տարբեր բանտերի դատապարտյալներ ազատ են արձակվել՝ նոր կալանավորներին բանտախցերում տեղավորելու համար:
Ներկա դրությամբ Թուրքիայում դատապարտյալների թիվը 201.177 է, նրանցից 2.800-ը 12-17 տարեկան երեխաներ են:
