Վիրավոր զինվորի ծնողները վրդովված են ՊՆ-ի անտարբերությունից. 3,5 ամիս անց նույնիսկ հոգեբան չեն տրամադրում. news.am

Արցախում ապրիլի 17-ին հակառակորդի կողմից արձակված կրակոցից վիրավորում ստացած 19-ամյա Թաթուլ Հարությունյանի ծնողները վիրավորված են Պաշտպանության նախարարության անտարբերությունից, հայտնում է news.am-ը։

19-ամյա ժամկետային զինծառայողն արդեն 3,5 ամիս է՝ ՊՆ կենտրոնական կլինիկական զինվորական հոսպիտալում է, սակայն առ այսօր նախարարությունից ոչ ոք նրան չի այցելել, միակ օգնությունը եղել է 200 հազար դրամը:

«Մենք դիմել ենք, որ պաշտպանության նախարարի հետ հանդիպում ունենանք, բայց մինչեւ հիմա ոչ մի արձագանք չկա: Հենց ընենց հոսպիտալում պառկած ենք: Բուժումն այստեղ ավարտել ենք, մեզ հիմա վերականգնողական բուժում է հարկավոր «Առաջին հիվանդանոցում», հատկապես հոգեբանի կարիք ունի Թաթուլը, բայց հիվանդանոցից մեզ հայտնում են, թե տեղ չունենք, իսկ օգոստոսին էլ մասնագետներն արձակուրդ են գնում»,- NEWS.am-ի հետ զրույցում ասաց Թաթուլի մայրը՝ տիկին Նարինեն:

19-ամյա զինծառայողը վիրավորում է ստացել գլխի շրջանում: Թաթուլը բարեբախտաբար հենաշարժողական խնդիրներ չունի, լոգոպեդի այցերի շնորհիվ արդեն խոսում է, հիշողությունը նույնպես վերականգնվում է: Տիկին Նարինեի խոսքով, որդին նաեւ ինքնուրույն ուտում է, բայց հեղուկ խմել չի կարողանում։

Ամբողջությամբ կարդացեք սկզբնաղբյուր կայքում։