Լեւոն Մկրտչյանը երեք ընկերությունում բաժնեմաս ունի. ԿԳ նախարարի ունեցվածքը
ՔԱՂԱՔԱԿԱՆՈՒԹՅՈՒՆ
ՀՀ կրթության եւ գիտության ՀՅԴ-ական նախարար Լեւոն Մկրտչյանը Բարձրաստիճան պաշտոնատար անձանց էթիկայի հանձնաժողով է ներկայացրել իր ունեցվածքի եւ եկամուտների մասին հայտարարագիրը, որից պարզ է դառնում, որ նորանշանակ նախարարը բազմաբնակարան շենքում երկու բնակարան ունի, մեկ ավտոտնակ եւ մեկ հողամաս:
Լեւոն Մկրտչյանը որպես շարժական գույք հայտարարագրել է մեկ Lexus RX 350 տեսակի ավտոմեքենա: Նորանշանակ նախարարը երեք տարբեր ընկերությունում 37 միլիոն 150, 85 հազար 650 եւ 70 միլիոն 444 հազար 600 դրամի բաժնեմաս ունի: Բացի այս, նա 56 հազար 326, 10 հազար 505 եւրո եւ 317 հազար 726 ռուբլի փոխառություն է տվել:
ԿԳ նախարարի պաշտոնը ստանձնելու օրվա դրությամբ Լեւոն Մկրտչյանն ունի 20 հազար դոլար, 25 հազար եւրո եւ 10 միլիոն դրամ: Այս տարվա հունվարի 1-ից մինչեւ փետրվարի 24-ն (նախարար նշանակվելու օրը) ընկած ժամանակահատվածում Լեւոն Մկրտչյանը 149 հազար 200 դրամ աշխատավարձ է ստացել, մյուս եկամուտները գոյացել են երեք ընկերությունում ունեցած շահաբաժնից: 1 միլիոն, 2.5 միլիոն եւ 500 հազար դրամ եկամուտը գոյացել է այդ ընկերություններում ունեցած շահաբաժնից:
Նշենք, որ Բարձրաստիճան պաշտոնատար անձանց էթիկայի հանձնաժողովում նրա կնոջ՝ Նատալյա Արծրունու ունեցվածքի եւ եկամուտների հայտարարագիրը դեռ հրապարակված չի:
