Մարդիկ այնքան հիասթափված են, չեն էլ պայքարել ցրտի դեմ. Ռինդում վնասվել է նաեւ հոնը, խաղողը

Վայոց Ձորի մարզի Ռինդ գյուղում ծիրանենիներից բացի ցրտահարվել են նաեւ դեղձի, հոնի ու նուշի ծառերը: Մեծ հավանականությամբ ցուրտը վնաս է հասցրել նաեւ խաղողի վազերին: Մեզ հետ զրույցում այսպիսի կարծիք արտահայտեց Ռինդ համայնքի ղեկավար Հուսիկ Սահակյանը:

«Ցրտահարության հստակ պատկերի եւ պատճառված վնասների մասին դեռ հստակ թվեր չեմ կարող ասել, որովհետեւ դա կերեւա առաջիկա օրերին, երբ արեւը դուրս գա եւ սառած բողբոջները տաքանան: Որ ցրտահարություն եղել է՝ միանշանակ: Այսօր առավոտյան ժամը 09:30-ի դրությամբ դեռ -2 էր: Կիսաբացված ծիրանենին ամբողջությամբ սառել էր: Չնայած նման ցրտի պայմաններում մտավախություն կա նաեւ, որ մյուս կորիզավորներն էլ են ցրտահարվել: Մասնավորապես դեղձենին, խաղողն էլ վնասված կլինի, որովհետեւ խաղաղի մեջ էլ նյութաշարժությունը սկսվել էր արդեն: Բացի այդ, հոնն ու նուշն էլ ամբողջությամբ ծաղկած էին, դրանց եւս ցուրտը տարել է»,- մեզ հետ զրույցում իրավիճակը ներկայացրեց Ռինդի գյուղապետը:

Ընդ որում, ըստ նրա՝ գյուղի բարձր գոտիներում վնասն ավելի շատ է, քան ներքեւի հատվածներում: Ռինդի մի հատվածը ծովի մակերեւույթից բարձր է 1200 մետր, իսկ մյուսը՝ 1400: Նշենք նաեւ, որ գյուղն ունի 70 հեկտար պտղատու ծառերի այգի, եւս 100 հեկտար խաղողի այգի:

Գյուղապետից հետաքրքրվեցինք, թե արդյո՞ք գյուղացիները ցրտահարության դեմ ինչ-որ միջոցառումներ իրականացրել են.

«-6, -7 աստիճանի դեպքում ոչ ոք էլ չէր գնա նման քայլի, որ ավելորդ ծախս աներ: Նախ ոռոգումը մեզ մոտ սկսվում է ապրիլի 15-ից, էս պահին ջուր չունենք ոռոգման, հետո դա ավելորդ աշխատանք ու ծախս էր լինելու: Տարիքով մարդիկ բոլորն էլ գիտեն, որ պարագայում կարելի է ոռոգում անել, որ դեպքում ծխահարություն: Բոլորն էլ հիասթափված ու թեւաթափ էին՝ հասկանալով, որ -7 աստիճանի դեպքում ծխահարությունը որեւէ արդյունք չի տա: Բացի այն, որ դա օգնում է մինչեւ -2-ի դեպքում, այլեւ մեր գյուղը ձորի մոտ է, ամբողջ ծուխը լցվում է ձորը եւ ծառերին օգուտ չի տալիս»,- վստահեցրեց նա:

Հիշեցնենք, որ այսօր գյուղատնտեսության նախարարությունը տեղեկատվություն էր տարածել, ըստ որի մարտի 20-ին լեռնային գոտում եւ նախալեռնային տարածաշրջաններում տեղացած ձյունը եւ գրանցված բացասական ջերմաստիճանները շարունակել են վնաս պատճառել գյուղատնտեսությանը:

Մասնավորապես Արմավիրի եւ Էջմիածնի տարածաշրջաններում, Բաղրամյանի տարածաշրջանի առանձին համայնքներում, Արարատի մարզի Արտաշատի տարածաշրջանում ցածր ջերմաստիճանի հետեւանքով ավելի արտահայտված վնասվել են ծիրանենու թաց ծաղիկերն ու նոր բացվող բողբոջները: Արարատի տարածաշրջանում առանձնապես լուրջ վնասներ չեն գրանցվել` բացառությամբ մի քանի համայնքների: Վայոց ձորի մարզում հիմնականում տուժել է Արենի գյուղը, մասամբ` Ռինդը եւ մի քանի համայնքներ: